٢٠‏/٠٦‏/٢٠١١

ما يقلب فينا ويخلص




يسعدلي صباحكم ..
تدوينة صباحية على غير العادة ..

قبل شهرين من هلقيت كنت رايحة أقدم لوظيفة في جامعة غزة وفي المقابلة الرابعة، تخيلو قابلو المتقدمين أربع مرات، طلعت من بيتي الساعة 9 ع أساس الموعد تسعة ونص، والجامعة مش بعيدة كتير أول حي الزتون، بدها مواصلتين ركبت سيارة من بيتي لشارع الصناعة، ومن الصناعة للزتون، الكراسي اللى ورى بالسيارة كان قاعد عليهم ركاب، فأنا ركبت جنب السواق، السواق عشان تفهمو عليا منيح اللي جاي لازم اشرحلكم كينونته، رجل فى حوالي الخمسين من العمر الظاهر انو سلفي من العمة اللى لابسها، ولحيتو الطويلة، نزلو الركاب عند أخر شارع الصناعة، وكمل السواق الطريق لجامعة غزة، فجأة وخير اللهم اجعله خير، لقيتو بقرأ قرآ بصوت عالي، وبسرعة بسرعة، نازل تجويد،وهاتك يا قراية في سورة البقرة، ويعيد في آيـــة معينة يمكن خمس ست مرات .
أنا طبعا ما حطيتش منطق على قولة سعيد صالح، كل الأفكار السودة اللي فى الدنيا إجت ب راسي
1.    هو الصاروخ هينزل إيمتـــا
2.    معقول السيارة مفخخة وهتنفجر فينا
3.    السواق هادا مجنون ووقعتنا طين
يا بيي ما اعطلها هديك اللحظة، بيني وبينكم قعدت أتشاهد، إنو ولا فكرة منيحة إجت ببالي، وطبعا السيارة ماشية وقف السواق قدام كلية المجتمع وركبو 3 منقبات ورا، سألهم يا بنات بتعرفوش تحكو تحية ودعاء الركوب، ولا وحدة ردت عليــــه، قام قالهم سنن الرسول قراء دعاء"سبحان من سخر لنا هذا وما كنا له موقنين"، وبدا درس العقيدة السواق، طب يا بنات وحدة فيكم تحكيلي ما هو دعاء الخروج والدخول من البيت، ولاوحدة ردت، السواق إنصدم، معقول يا بنات لا تعلمن الدعاء، بنبعتكم عالجامعة تتعلمن، هذه أساسيات من المفترض إن تحفظنهــا..
و الحمدلله السواق وصل ونزلت أنا قدام الجامعة، والسؤال اللي بطرح نفسه السواق ليش قعد يقرأ قرآن بالطريقة المرعبة هاى؟.

هناك ٨ تعليقات:

علا من غزة يقول...

بدو يهديكي
شكلك ما كنتيش متبعة الـdressing code المزبوط بالنسبة لتعريفاته
بس ايش كمية الخيال العلمي الي فيكي يا رندة ههههه سيارة مفخخة !
انا لو محلك كان ما اجى في بالي هيك فكرة .. كان قلت هادا بدو يكسب فيا ثواب ويردني للصراط المستقيم :D

رندة أبو رمضان يقول...

شايفة بالله يا علا
في صديق حكيتلو القصة، حكالي عشانكون اتنين فى السيارة وثالثكما الشيطان، ضل يقرا قران ههههههههه

ola omran يقول...

ههههههههه رندووووش يعطيكي العافية .. فعلا شي بيخوف انا كمان لما يبالغ السواق في الدين بقول امري لربي وهادا يومي واللهم لا اعتراض !!! اما بالنسبة لقراءة القران اكيد اكيد اكيد لانه كان خايف على حاله منك والشيطان شاطر انتي عارفة وهادي تعتبر خلوة هههه خلوة مش بشعة فعشان هيك كرر القران بالطريقة المرعبة هاي صارت معي بالاصنصير لوووول ..

رندة أبو رمضان يقول...

علا 2
يعني انا مش لحالي بهيك موقف الحمدلله، الاصانصير اصعب والله، انا عارفة بيطلعولنا منين يختي

فوبيا يقول...

المشكلة ,,, و أكبر مشكلة بالعالم غنو كل سواق , ممكن يكون محلل سياسي , و محلل أقتادي , وعالم مجتمعي , وناقد للاوضاع العالمية ,, بس مرة سواق قعد يحكي عن تحركات الرئيس و المصالحة و ضيعونا ,, سألتو : شو هيا الثوابت الوطنية ... ما رد عليا عزرتو يمكن سواق ومو متعلم , سالت السؤال لصديق إلي ما عرف يرد ,, نحن نعيش لأن نتعلم ,,

givara يقول...

ده على اساس ان السياره خلوه عملا بالحديث يعنى
اللى بيدايئنى اوى
ان مفيش سواء الا وتلاقيه محلل رياضى واقتصادى وسياسى كمان
ومطلوب منى انى اسمعله
ومطلوب منى ابينله انى فاهم انه فاهم
بوست دمه خفيف اوى

ليالي باريس يقول...

مسخرة و الله

تحياتي

هديل يقول...

هههههههههههههههه الحمد لله اللي ما كنت هناك .. كان قلتله وقف و كملتها كعااابي :D