٠١‏/٠٦‏/٢٠١١

نشفان ريق .

التدوينة الثانية –ضمن حملة "دون" التدوين اليومي لشهر حزيران
كنت مرة بحكي مع صديقتي بيسان جابر من الضفة الغربية عن كيف نستلهم الأفكار للكتابة، وتشابهت طرقنا الأسهل، وكانت تاكسي الأجرة ..
تاكسي الأجرة الملهم الأول لأي حد ناوي يكتب تدوينة بفلسطين، لأنو بمجرد ما تشاورولو ويوقف وانتو تركبو، أكيد كلكم بتحسو متل ما بحس، بتدخل عالم الأخبار، ومتل ما السواق بيقود السيارة بردو السواق بيقود مبادرة الموضوع اللى كل السيارة بتصير تفتي فيـــه، وكلام السواق منزل من فوق ومن المسلمات، يعني لو جادلتوه أجاركم الله، هادا غير القصص والأخبار اللي بتسمعوها واللي ممكن تصير وتربطو المعلومات اللى بيحكوها الركاب والسواق وبالنهاية تصلو للشخص، لأنو غزة أصغر من خرم الإبرة .
من أحدث المواقف وأطرفها بقصة التاكسي معي ، من إسبوع تقريبــا كنت نازلة الصبح رايحة شغلي، وقفت على خط  شارع النصر وشاورت لسيارة وقفت، قلتلو عند "قصر الحاكم" شاورلي إنو أطلع ..
ولما السيارة مرت من قدام مستشفى الشفا، كانت المنطقة ملغمة شرطة مرور، يمين وشمال
صار السواق يناجي الله، ع اساس مش مأمن ولا مرخص، وهالسيارة ماشية وعدى من قدام مرور غزة باتجاه جامع العباس، إلا السواق وقف لواحد معرفته اللي بالصدفة طلع شرطي مرور.
بعد موال السلامات والكلامات اللى قالوه، والسيارة ما تحركت سم واحد لأنو رمزون العباس صار اشي بخنق بصراحة، وصلنا للمهم
السواق : مالكم يا جماعة منتشرين
الشرطي: والله منا حابب هالشغلة انسطلت بالشمس، بس الرزق يا ابن عم
السواق : الله اللي سترنا بس عدينا من قدام الشفا
الشرطي: شكلك مش مرخص
السواق: متلي متل غيري هو انا احسن
الشرطي: اللي إلو معرفة بغلبش بالمرة
السواق: في واحد قريبنا بس تقول يالله قديش بكرهو
الشرطي: ليكون الشرطي اللى قدام الشفا، أبو نضارات ؟
السواق : لا لا بشتغل عن رمزون السرايا، شفت انت كيف ام جهاد منشفة ريق الناس
هو اكتر منها , ولا بكرم لحدا، عالطالعة والنازلة بوقفنا وبسلخ مخالفات
الشرطي: يمكن لو شفته بعرفه
السواق: صدقني لو يصحله ليعمل حملة "هيا ننشف ريق السواقين" ضدنــا ..

هناك ٥ تعليقات:

Emtiaz Zourob يقول...

صحيح والله ، اللي بده يعرف اخبار البلد ، يعرفها من السواقين .. ربنا يبعد عنا وعنك نشفان الريق ..

Unknown يقول...

للأمانة .. انا في نظري السواقين هم مصدر خطر في البلد .. لانهم بيعرفوا كتير حاجات .. بالاضافة لو انه في حال كنتي ساكنة جمب ساحة انتظار او تجمع تكسيات .. فهما بيعرفوا مين طلع من البيت و مين دخل و غيره .. انا ما بقصدهم كلهم طبعا .. قصدي واضح

حلم بيعافر يقول...

هههههه

الظاهر ان دى ظاهرة عالمية

غير معرف يقول...

في المرة القادمة انصح بالطلب من السواق ابراز ترخيص السيارة كشرط لركوب السيارة
و بعدين نسأل السواق هل تعرف شرطي
اذا اجاب بالنفي نركب
واذا اجاب نعم لا نركب
و على العموم يضرب هيك سواق

رندة أبو رمضان يقول...

بدنا نطلب ميزة انو الرئيس الجاي يكون اشتغل سواق عالخط قبل هيك ، تلبية لرغبة الجماهير