22‏/05‏/2011

أنا و اللي صاير

مش متأخر ولا إشي ، بس لازم أحكيلكم إنو يوم نزلت على 15 آذار للشارع عشان أطالب بإنهاء الانقسام كان يوم تاريخي، أنا عمري يا جماعة الخير ما شاركت بمظاهرة، ولا مشيت بمسيرة أبدا أبدا.
وأنا ماشية من بيتي لمكان التجمع فى ساحة الجندي المجهول، حسيت إني طايرة، انا رايحة أتظاهر، يا سلااااام، معقول إجا اليوم اللي الشباب في بلدنا صارو ينطقو  وطلعلهم صوت كل الدنيا بتسمعو، كل واحد من الموجودين كان رايح لهدف، انا وانا رايحة كنت براجع مجموعة أهدافي، أيوة يا رندة ايش بدك بالزبط من المظاهرة هادي، ركزي استجمعي افكارك ايوة ايوة بالزبط :
انا بدي أمشي بالبلد مش خايفة من حدا
انا بدي بلد ديموقراطي
انا بدي أحكي اللي بدي ياه
انا بدي معابر مفتوحة
انا بديش بطالة 6 شهور ب 1000 شيكل
انا بدي اشتغل بمجال دراستي
انا بدي اسدد قسط الجامعة اللي عليا من 4 سنين
انا بدي كهربا 24 ساعة
انا بدي مية نضيفة
أنا بدي أبويا يرجع ع وظيفتو
انا بدي نتحرم بعض
انا بدي دار جيرانا ترجع تتعمر
وبدي قرايبنا الاسرى يطلعو من السجن
"كل هدول يا أنانية بدك ياهم" إيش خليتي لغيرك؟، ماهو التظاهرة هاى عشان أطلب هالمطالب إللي ولغيري، هو انا لحالي اللي هيك يعني؟، نص مليون شاب وشابة فى البلد نفس وضعي و أسخم والحمد لله .
وجريت الأحداث بسرعة بسرعة وهيهم تصالحو مشالله عليهم الأخوة بفعل فاعل إيش هو الله اعلم، بدناش إنشكك فى النوايا، بس انا بحذركم  تحذير شديد اللهجة، انتو يا جماعة الخير ياللي تصالحتو، وياللي ناويين تمسكو البلد، وتصلحوها إياكم ولعنة الكراسي ، واتذكرو انتو بمواقعكم اللي صرتو فيها هلقيت جايين عشان تزبطو الأمور  وتصير جنة جنة جنة يا وطنا ..
إحنا الشباب بصراحة فاض فينا يعني وبصراحة اكتر إحنا قاعدينلكم بالمرصاد و مستنيين إلكم على نقرة، الله لا يجيب النقرة، وبوعدكم وعد إزا هالنقرة هاي إجت سايبالكم إياها مخضرة على قولت ستي ، خودو الجمل بما حمل بس قبل ما أسيبها انا وغير اعرفو انو التاريخ ما راح يرحمكم ولا الناس ومش راح تقدرو تعلقو خيبتكم على شماعة الاحتلال واليهود ، وبرجع وبقول انا مش بحبطكم أنا جاية اعرضلكم عينة من الإحباط الموجود عنا كلنا إحنا الشباب، ليش راح نسيبلكم ياها؟ إزا خربت
لأنو كل واحد بطمح بمستقبل أحسن وإحنا ضيعنا كتير من عمرنا نستنا هالحلم، ومش على استعداد أبدا نضيع اكتر من هيك، وإزا مش مصدقين إنزلو اسألو أي شاب او شابة في الشارع عن هيك، صدقوني الجواب واحد
"باسبوري معي، والمستقبل قدامي".

هناك 6 تعليقات:

حلم بيعافر يقول...

يعنى ايه جخ ياغزاوية؟)))...

رندة أبو رمضان يقول...

جُح = يعني لو جينا نفسرها بالمصري هتلاقيها = بالبلدي

وجع البنفسج يقول...

للاسف لم يكتب لي المشاركة في مظاهرات 15 اذار والسبب اني رحت بدري كثير ومالقيتش حدا ورجعت روحت ع الدار ، وثاني يوم رحت متأخرة ومالقيتش حدا برضه وروحت ع الدار ..

عموما مطالبك هي مطالبنا جميعا وصوتك هو صوتنا جميع ..

اما بالنسبة للباسبور ، فأنا لسه عندي أمل ومش مستعجلة ع الخطوة هذه خالص رغم الاصوات القادمة من بعيد والتي تدعوني للمغادرة من هنا بدري بدري .. بس انا لسه باقاوم وح اقاوم

بالنسبة لج .. انا غزاوية ومش فاهمها او بالاصح اول مرة اسمع فيها ؟؟ يعني قصدك مثلا .. فلسطيني قُح !!يعني الجيم بالمصري ولا لأ ؟؟ معلش انا جاهلة شوي بالغزاوي القُح !!

دمت اختي الغالية بكل خير.

جُولاني يقول...

هاد للأسف صار تفكير كل شب باسبوري معي و مستني المعبر يفتح .. بعين الله

رندة أبو رمضان يقول...
أزال المؤلف هذا التعليق.
رندة أبو رمضان يقول...

بنفسج: النزول الى ساحة التجمع مش معناه انو اللي ما نزل ما شارك، مجرد تعليق العلم على سطح بيت اى حدا هاى بحذ ذاتها مشاركة وكون عندك الايميان بمبدأ 15 آذار هادا اعظم مشاركة
وبالنسبة ل جح فهي نعم بالجيم المصرية وهي نفس معني قُح بس موطنين غزة بقولوها جُح :)
جولاني: في كتير شباب تفكيرهم بس مؤطر بالسفر الباسبور دون النظر للواقع يعني الهدف هو الهروب من حال غزة
لكن ما اعنيه انو احنا بنعطي فرصة وبنستنى بس مش معناتو انو نضيع عمرنا، وكون باسبورنا معنا معناتو احنا كمان النا حق نحلم ونطلع نتعلم ونشتغل وناخد فرصنا بالحياة ونرجع نعمر ونبني ونفيد مش نروح نغسل صحون هناك ونستكفي