٠٩‏/٠٨‏/٢٠١١

قطعت الكهربا


الخبر اللي تصدر عناوين الأخبار الفلسطينية امبارح كان من تخوف عمال شركة الكهربا من الدواعي اللي بيدعوها مليون و800 ألف مواطن في غزة عليهم، فبمجرد إنو الكهربا تقطع بيبدى سيل الدعاوي اللي كلنا صرنا نحكيها بوعي وبدون وعي، زي هيك:
"الله يقطع إيدو اللي قطعها، الله ينزلو فى قعر جهنم اللى نزل السكينة، الله يقطع رحمتو عليكم يا تعون الكهربا، نشوف فيكم يوم عتمة زي ما عتمتو علينـــا".
وطبعا عمال شركة الكهربا خايفين من انو هاى الدعاوي تصيبهم أو تصيب عائلاتهم، وأنا هنا بدي أوقف وقفة مع المواطنين وخلينا نسألهم بدون ما نروح نستفتي حد، هو العامل الغلبان فى شركة الكهربا بحكم ع إشي غير عالسكينة اللي برفعها وبنزلها حسب جدول محدد من المسؤلين عن توزيع شبكة الكهربا؟.
طبعا لأ، يا جماعة الأزمة مستمرة من وقت طويل ومرينا بظروف أصعب من هيك كان وقت انقطاع الكهربا يصل 18 ساعة صح؟، طب وأيام الحرب2008 قعدت الكهربا 20 يوما مقطوعة.
بدنا نستحمل بعض بجملة الأشياء اللي مستحملينها بهالبلد، وخلينا نتخلص من هالعادة السلبية، كل ما دقت المية بالكوز وقطعت بنروح وإحنا سالخينهم دعاوي للعمال عليهم وعلى أولادهم، يعني هٌما لو كان في إيدهم يجيبوها 24 ساعة ما كان جابوها، والقطع على الجميع مش عليك إنت لحالك، الأزمة طايلة كل البلد.
بقدر أسباب الجميع، كتير ناس انحرقت عندهم أجهزة، او بيوت أو مخازن، وصعب بهيك وقت نقدر نعوض اللي راح، وكمان انا مش مقتنعة بمبررات شركة الكهربا والسكوت المحلي والوطني على الأزمة اللي كل يوم بتتفاقم.
والفتوة جاءت بعدم جواز الدعاء على العمال في شركة الكهرباء بغزة
وبالمناسبة أول ما الفتوى صدرت لقينا صفحات على الفيس بوك تطالب بإسقاط شركة الكهربا : يا جماعة هو في شركة تانية عشان نسقط الأولى؟
وإزا حبيتو تدعو، إدعو على اللي وصلنا لهادا الحال أيا كان ..
وسؤال تاني: إيش بالنسبة لعمال شركة حضارة؟


*ملاحظة الكهربا عندي قاطعة وانا بكتبلكم هالكلام، ومعنديش قرايب في شركة الكهربا

هناك ٣ تعليقات:

النآيفةةَ * يقول...

الله يفرجها عليكم .. وانتي صادقه شو بيقدروا يعملو .. ممكن هالعمال المساكين مش بيدهم..

Emtiaz Zourob يقول...

والله احنا بندعي عليهم دايما بصراحة ، بس فكرك الدعوة بتوصل يعني ولا حتى مستجابة .. بنمسكها من اصغر عامل في شركة الكهرباء حتى اتخن مدير ..
عن جد تسببوا لنا بمضار كثيرة واهمها وعلى رأسها الاكتئاب يا اوختي ..

عموما ربنا يهد كل واحد بيشارك في تنكيد الشعب الغزاوي الحر الأبي .

بالنسبة لحضارة ، انا بادعي ع الترا نت مش حضاره ههههههه ، بس لسه الترا اهون من حضارة ، تيجي نغير لفيوجن ؟؟

"""""""""

رمضان كريم ..

رندة أبو رمضان يقول...

عنجد احنا من اشي ل اشي عمالنا
الوضع صار لا يطاق
الله ينكبووو نكب اللي كان السبب بجد
حسبي الله عليه
ويهدي اللي في ايديهم الحل يارب
بنفسج ما هما كلهم مادين من حضارة بالنهاية ولا ايش؟