26‏/07‏/2011

عالطريق

إقرأ القطعة التالية ثم أجب عن الأسئلة:
من أسبوع بالتحديد قررت أنا و والدتي نزور صديقة عمري اللي راجعة من الإمارات ومش شايفاها من ست سنين، ولان المشوار بياخد وقت من غزة لخان يونس، طلعنا بنص النهار تقريبا.
كلشي تمام ووصلنا الحمد لله وتأكدت من انو ذاكرتي شغالة كويس لما عرفت بيت صحبتي اللي اختفى بين العمران وشكل المنطقة تغير خالص، و إحنا مروحين كانت الدنيا مغربية، نزلنا شارع جلال عند موقف غزة، ولقينا وسع في باص هونداي، وقعدنا نستنى السواق على ما يحمل باقي الركاب، وما فيش دقيقتين إلا وشاب ماسك عود دخل الباص وقعد في الكرسي الوراني، وبعد بثواني دخل واحد تاني ماسك دف، وراهم عاد دخل واحد تالت معاه أورج، وانطلق الباص بحمد الله.
بالطريق رن جوال أبو دف: ألووووووووووو
ولك ألووووووووووووووووو
سامعني .. يا عمي إوقف في منطقة فيها إرسال
معلش أنا راكب الميكروباظ ومش سامعك كويس
وقف يا سواق شوية خلينا ناخد راكب
قلت أنا بس الظاهر الرقاصة هلقيت هتطلع أما نشووووف، و مازبطش توقعي وفرقة حسب الله ماكملتش طلعو اتنين ستات ومعهم شاب وركبو ورا في آخر كرسي.
ورن جوال أبو دف تاني:
ألوووووووووو
هلا أبو الشباب، وين أيامك كيف حالك، مبروووووووووووووك، أماااااااااااااااانة، أنا سدااااااااااااااااد
بدك جهاز يعني، وين السهرة، آه عند الأوروبي، بسيطة، في عندي شاب بسد فى الشغلانة، مش بعيد عنك في قيزان النجار ساكن، طب بدك مايكات، اورج لا معنديش الفرقة بتيجي ومعها أورج، آه الحفلة اسلامية، خليني أدبرها وارجع رنلي على رقمي كمان خمسة.
أبو دف بحكي للي جنبو أبو عود: هادي حفلات هادي، أي والله زمان ما كنا ملاحقين حفلات، الناس كانو يتخانقوا على الفرق، علللي يا سوااااااااااااااااق عللي خلينا نسلطن.
و إم كلثوم تصدح ب: "قد إيه من عمري قبلك راح"
أبو عود: يا سلام عزمان ما أحلاه زمن البساطة وكلشي حلو و الدماغ رايق واللقمة مكفية، كنت ادق عالعود بالخمس ساعات ولا اتعب، كان في سميعة أصليين، هلقيت يادوب أطلعلي اربع خمس سهرات في الشهر وكلهم حفلات رقص وهقص، وإيش بيعملو، انت عارف
قاطعه أبو دف: إسمع بالله اسمع ايوة ايوةةةةةةةةة يا عيني : رااااااااااااح تيرارا وعدى يا حبيبي.
يا سواق بدنا ننزل عند موقف جباليا يا حبيبي، يرضى عليك سرعلي هالميكروباظ شوية، السهرة عدها بدت، والسماقية نزلت للمعازيم.
صار السواق يضحك طبعا، وأنا مش مستوعبة بصراحة بقول لإمي حاسة حالي راكبة ميكروباص مصري واللي زاد وغطى طريق صلاح الدين بعطي إيحاء انو انت برة البلد.
نزلو أعضاء الفرقة الموقرين، وانا صرت مركزة مع إم كلثوم إلا والشاب اللي ورا مستغرق في الكلام
مع الستات اللي معاه ويبدولي انه وحدة أخته والتانية خطيبته:
هلقيت بنزلكم عالجندي، أي إيش الجندي، فخم فخم، غزة حلوة ، كل ما اطلع من خان يونس بحس حالي رايح باريس.
"باريس" :S ، ما علينا نكمل.
خطيبته ردت: يالله من زمان نفسي أنزل عغزة، الحمدلله الله حققلي حلمي.الشاب: ولا يهمك من يوم وطالع أحلى مشاوير عغزة إلك واللي بدك ياه بوظة بجيبلك براد بجيبلك فستق حلبي بجيبلك وبنتمشى كمان فى سوق الرمال، وباخدك عشارع حلو كتير مضلل شجر اسمو شارع العشاق.
عندك بالله يا سواق أيوة عند معتوق يا حبيبي.

السؤال الأول
ما معنى المصطلحات التالية:
1. هقص
2. قيزان
3. يخو

السؤال الثاني:

"ميكروباظ": مصدر ( رباعي – خماسي- إزعاج)

السؤال الثالث:

1. سبب نزول السماقية للمعازيم
2. ما وجه الشبه بين غزة وباريس
3. علل تسمية شارع العشاق بهذا الاسم

هناك 4 تعليقات:

HamadA2010 يقول...

هههههههههههههههههههههههههههههههههههه .. أحلى مدونة و الله ... و ألذ ما في الموضوع الأسئلة نفسها نهفة ..... و بالنسبة لكلمة قيزان النجار : فهذا مكان موجود بخانيونس : و كلمة (قيزان) معناها هو السطل المصنوع من الحديد للي بتحطي فيه مياه و بتسخنيه على النار ... تحياتي إلك يا رندة و بالتوفيق

أحسن تـستاهـل يقول...

بموت فيكي لما تحكي الحواديت دي
::
مها ميهوووو

غير معرف يقول...

انا عاوز اعرف فين شارع العشاق دا عشان انا نفسى اروحه

سكر زيادة يقول...

تدوينة رائعة , بتضحك كتير و بشوف كل يوم قصص من هاي النوع ,المهم انك انبسطي حلو .وأحلى شي غزة باريس بس يمكن غزة أحلى من باريس بشوي . شو نعمل بنضل نحبها ل غزة قدرنا ...

بس يا ريت تقولي وين شارع العشاق صار الي 26 سنة بغزة وما بعرفوا معقول .