07‏/08‏/2010

جيتك يا عبد المعين إتفك


مش عارفة هو الموضوع بحصل معايا أنا بالذات ولا حاصل مع كل البلد، فبالتالي بنقدر نسميه أزمة؟؟.
هادا من فترة كنت نازلة أدور على خياطة تخيطلي جاكيت ، المهم نزلت من بيتنا وركبت سيارة عن الشارع، فتحت الجزدان وللأسف ما معي الا ورقة بخمسين شيكل ونص شيكل، مسكت الخمسين وقلت للسواق اتفضل، قالي أوووف كل هادي معكيش شيكل فكة، قلتلو لا والله معلش،بس معي نص شيكل إتفضلو، قالي لا خليها عحسابنا هالمرة، انا ما طاقتني الشربة ووجهي إحمر و اخضر واصريت إلا أعطي السواق النص شيكل، على اساس المبدأ اللي بقول :" إشي ومنو".
نزلت عند الخياطةةةةة اللي حاولت معها بشتي الطرق عشان تخيطلى الجاكيت وأبدا، ووصفتلى خياطة عند جامع الكنز، مشيت كده قد 5 دقايق ووصلت المكان، حكيت مع الخياطة بس مانفع إنها تخيطلي الجاكيت عشان الماكينة تعت القماش مش عندها، حملت حالي وطلعت، طبعا كنت في نص سوق الرمال، دخلت الميني ماركت اللي جنب إيميد إيست،  شريت إزازة عصير ع أساس أفك الورقة إم الخمسين، إلا والبياع بحكيلي آسف والله فش فكة .. S:
رجعت العصير عالتلاجة، وسحبت حالي ، بعد بعشرة متر لقيت ميني ماركت تاني، قلت خير ، دخلت شريت إزازتين عصير عشان ما يكون للبياع حجة، إعطيتلو الخمسين، جحرني S: ، آآآآآسف مافي فكةةةةة توى إجاني زبون أخدها كلها، أأأأأوف تكرر الموقف رجعت العصير عالتلاجةةة وطلعت أجرجر أذيال الخيبة ..
والشمس حاميةةةةةةة والساعة 5 العصر، وانا ماشية صادفت صيدلية الجندي المجهول، قلت خير بفك من عندهم، دخلت طليت هيك المهم قلت كويس بجيب شامبو ، طلعت الورقة أم الخمسين واعطيتها للصيدلانية، قالتلي: فش فكة متأسفة معكيش 15 شيكل، قلتلها لا والله ولا شيكل معي، فكرت شوية مع حالها وإعطتني ورقتين عشرين..
المهم طلعت أنا فرحااااااااااااانة زي اللي كسبت مليون دولار.
صدقت حالي معي فكة ورقتين عشرين.. وقفت سيارة وقلتلو التلاتيني ع اساس رايحة لخياطة تالتة، مديت ايدي للسواق ادفع بالعشرين الورق قالي مافي فكة معي، قلتلو نزلني ، ورحت وانا موقفة سيارة تانية، عالتلاتيني لو سمحت قالي اطلعي، مديت إديي بالعشرين كمان مرة، والسواق حكالي نفس الاشي ما في فكة ، أووووف إيش أعمل بحالي بهاي اللحظة ؟
حملت حالي ونزلت ، وما كان الحل إلا إني طلبت تاكسي ويكون معو فكت عشرين، بس السؤال اللي بيطرح نفسووو، وين الفكة ؟؟؟ مين اللي ماخد فكت البلد كلها ؟؟؟

هناك 6 تعليقات:

ENG.UBUNTU يقول...

هي ازمة فكة في البلد مستمرة منذ قرابة الشهر ،،

سبب ازمة الفكة بكل صراحة " رمضان والعيد " !

وعادات شعبنا المتخلفة من عيدية وما الى ذلك

كل سنة بتتكرر هادي الازمة وكل عيد بتتكرر هادي الازمة بعد عيد الفطر بنرتاح شوي منها يمكن اسبوعين بس وبعدين الفكة بترجع بتتخزن من شان عيد الاضحى
يعني في تقريبا 4 الى 5 شهور من كل سنة بنعيشها من غير فكة !

غزة ،، بعين الله

رندة أبو رمضان يقول...

والله يا بشمهندش اسباب الازمة كتيرة
وانا معك حكاية العيدية سبب رئيسي ايام العيد
لكن فى غير ايام العيد ، السواقين بخبوها وتعون الصؤافة بخبوها و احنا بنجري وراها
كأنا بنبحث عن كنز

عندما يرحل السنونو يقول...

لا أفهم كيف يجد الكاتب متعة الكتابة حين يكتب بالعامية!

رندة أبو رمضان يقول...

عندما يرحل السنونو:
أجيد العربية واجيد الكتابة بها
لكن بعض الكلام لا يحتاج لفصحى
هل تتصور لو كنت انت من كتب الموقف وترويه لاصدقاءك في جلسة سمر ان ترويه بالفصحى .؟
تحياتي العطرة لك

رندة أبو رمضان يقول...
أزال المؤلف هذا التعليق.
مقلوبة يقول...

بتلاقيها عند تبع الجاج.. ههه
أو عند حدا من اللي بيبيع الفلفل الأخضر..

مقلوبة

http://maglouba.wordpress.com/