" مدونة چُـح "

2011-09-15T00:11:00.000-07:00

إنتقلت مدونة جح بالغزاوي إلى الرابط التالي:

http://www.gaza-go7.com/

زورونــــا هناك

أنا و الإذاعة

2011-09-06T20:28:00.000-07:00

تجربة رائعة جدا تكون معد ومقدم برنامج إذاعي، وخاصة لما تكون إذاعة متل إذاعة راديو ألوان
تابعوني ومنتظرة آرائكم عبر الاتصال على
2844114 - 19009
1248 sms
وعبر صفحة برنامجي على الفيس بوك بنت البلد مع رندة أبو رمضان وبإمكانكم الاستماع للبرنامج عبر موقع الاذاعة راديو ألوان 94.1 fm
كل يوم سبت ، إثنين و أربعاء الساعة الثانية عشرة صباحا

الحجة إم رندة تسأل

2011-09-02T03:23:00.000-07:00

اليوم الجمعة قعدت أنا و الحجة ام رندة نشرب قهوتنا الصباحية وكنا بنسمع الجزء 29 من القرآن على قناة العفاسي، مرت آية بتقول:

كَأَنَّهُمْ حُمُرٌ مُسْتَنْفِرَةٌ (50) فَرَّتْ مِنْ قَسْوَرَةِ

الحجة سألتني بتعرفي إيش معنى "قسورة" ؟، انا ما عرفتش، قعدت حكتلي القصة ولإنها قصة رائعة عن الرسول عليه الصلاة و السلام حبيت أنقلها إلكم

وهي إحدى المعجزات ..

"ذات مرة بينما رسول الله صلى الله عليه وسلم جالس بين أصحابه فإذا أعرابي من بلادي فارس يدخل على رسول الله صلى الله عليه وسلم ويقول له يا محمد من أين جئت بهذا القرآن

فقال له عليه الصلاة و السلام : من عند الله

قال الأعرابي : لا يا محمد لوكان من عند الله ما وجدنا فيه هذه الكلمات الأربع

قال عليه الصلاة والسلام : ما هذه الكلمات يا أعرابي ؟

قال الأعرابي : فأما الكلمة الأولى كلمة " يستهزئ " الواردة في قوله عزوجل " اللَّهُ يَسْتَهْزِئُ بِهِمْ وَيَمُدُّهُمْ فِي طُغْيَانِهِمْ يَعْمَهُونَ (15) " سورة البقرة ... فالعرب لا يقولون يستهزئ بل يقولون " يهزأ "

قال عليه الصلاة والسلام : هات الكلمة الثانية يا أعرابي ؟

قال الأعرابي : كلمة " قسورة " الواردة في قوله عزوجل " (49) كَأَنَّهُمْ حُمُرٌ مُسْتَنْفِرَةٌ (50) فَرَّتْ مِنْ قَسْوَرَةٍ (51) "سورة المدّثر ... والعرب لا يقولون قسورة بل يقولون " أسد " و" هزبر " و " ليث "

قال عليه الصلاة والسلام : هات الكلمة الثالثة يا أعرابي ؟

قال الأعرابي : كلمة " كبّارا " الواردة في قوله عزوجل " (21) وَمَكَرُوا مَكْراً كُبَّاراً (22) " سورة نوح .... و العرب لا يقولون كبّارا بل يقولون " كبير "

قال عليه الصلاة و السلام : هات الكلمة الرابعة يا أعرابي ؟

قال الأعرابي : كلمة " عُجاب " الواردة في قوله عزوجل " (4) أَجَعَلَ الآلِهَةَ إِلَهاً وَاحِداً إِنَّ هَذَا لَشَيْءٌ عُجَابٌ (5) " سورة ص .... والعرب لا يقولون عجاب بل يقولون " عجيب "

فسكت الرسول عليه الصلاة والسلام لبرهة والصحابة ينظرون إليه وجلس الأعرابي وظنّ أنه قد كسب الجولة

وفجأة دخل أعرابي من البادية" الصحراء" إلى مجلس الرسول عليه الصلاة والسلام وقال له " يا محمد أعطني مالاً فالمال ليس لك ولا لأبيك "

فقال له عليه الصلاة والسلام : ماذا تريد ؟

قال الأعرابي : اعطني مالاً

قال عليه الصلاة والسلام : ماذا تريد ؟

قال الأعرابي " أتستهزئ بي يا ابن قسورة العرب و أنت تراني رجلا كبّارى إن هذا لشيء عجاب "

عندها قال الأعرابي الذي سأل في البداية : أشهد يا محمد أنه لا إله إلّا الله و أشهد أنك يا محمد رسول الله

جمعتـــكم مبــــاركة

كل سنة ونتو طيبين

2011-08-29T20:57:00.000-07:00

‎"مآذن تُردد اللهُ أكبر اللهُ أكبر
تُطمئن القلوب، إنها الفطرة الأولى
لا كبير إلا الله
لا عزيز إلا الله
اللهُ أكبر على كل من طغى وتجبر
إنهُ أول أعياد الحُرية وليس آخرها"
رندة أبو رمضان

أنا لو استشهدت

2011-08-20T17:49:00.000-07:00

في أسئلة معينة لازم تمر على أهل غزة فرد فرد، خاصة بظروف حرب صعبة زي اللي إحنا فيها هلقيت منهم سؤال مهم

ونا كمان بحب أسألو لحالي:

هو أنا لو استشهدت إيش راح يصير ؟

طب أنا والله نفسي استشهد والله ياخدني عالجنة

أنا مش متشائمة، بالعكس بحب الحياة الحمدلله وبحب كل الناس اللي حواليا

بس الشهادة حلوة هيك بحكو الناس .. وهيك انذكر في القرآن

هو أنا لو استشهدت الأمور بتمشي عادي؟

طب هروح الجنـــة؟

طب يا ترى في أي نتفة راح استشهد؟

ومع مين ؟ ولا هستشهد لحالي

ياترى هيك على فجأة وأنا نايمة ولا قايمة ؟

ولا وأنا قاعدة بعمل أحب الاشياء على قلبي "التدوين".

حرب .. يلا

2011-08-18T12:59:00.000-07:00

غزة دايما و أبدا عايشة حالة غير متكررة أو مسبوقة، حصار، نزاع، وأولا وأخيرا حرب

ورغم انو كلمة حرب سهلة النطق لكنها صعبة التطبيق وعلى حساب البني آدمين، تلاقي الناس أول ما تسمع ولا تشم خبر إنو في حرب

بيعملو حاجات غريبة وكأنو البلد داخلة على مجاعة، ويا بتلحق يا ما بتلحق ..

وبعد أحداث إيلات اليوم، والتهديدات اللي صارت بشن حرب على غزة أنا طرحت السؤال وجبتلكم عينة من الاجابات..

وربنا يجيب اللي فيه الخيـــــــــــر

نفاق على الطريقة الفيسبوكية

2011-08-13T23:58:00.000-07:00

من يوم ما انضميت لشبكة الفيس بوك اللي صارت عالمية ب 2007 وانا عمالي براقب تطورات كتيرة على صعيد الناس اللي فيه و طريقة استخدامهم إلو، بعيدا عن انو ايش اتطور فى الموقع تقنيا، وطبعا تطوره تقنيا ما بينفي تغير وتطور طريقة استخدام الناس إلو.

زمان نرجع لل 2007 تاني، كنت أشوف الأبليكيشينات على صفحة البروفايل، "ألعاب و هدايا، وحظك اليوم، والناس تبعت لبعض ورد وفوانيس وزغاليل محشية وعالم افتراضي جنوني"، مبسوطين عحالهم، بعد شوية سنتين زمان يعني راحو شايلين الابليكيشينات ع جنب، وأجبرونا طبعا على إظهار شيء وحيد على صفحة البروفايل غير الحيطة ومعلوماتك الشخصية " مين صحابك ومين قرايبك" وبس.

زمان كمان مرة كنت اتنشق ألاقي حدا بعرفه عالشبكة وبألاخص قرايبي وصحباتي اللي برا تماشيا مع الهدف الأساسي للشبكة، وكان ولازال عندي اعتقاد إنو انا ازا ما بعرف الشخص شخصيا عالطبيعة ما بضيفه، هلقيت صرت متحيرة مين مش عالشبكة، مين أحزف ومين أخلي، تماشيا مع تطور الحياة وفي ناس بصراحة وجودها بيلزمكاش عالصفحة.

كالمعتاد بتبدا اتضيف الشخص عندك وبتكتشف انك تعرفت عليه متأخر، نظرا لوجود اشخاص كتير مشتركين بينكم، وبتصير تسأل حالك، وين كاين انا؟، وتتبادلولكم شوية كومينتات على صور وشوية خربشة عالحيطان

والترحيب المعهود عالفيس بوك اللي بيندرج تحت المصدر "نور"

" منور الفيس يا قمررررررررررررر، نوَرَت، نوركم، عليك نور، نَوَرِت، نورتي"

وبهيك بتكون مرحلة التواجد الروتينية الفيسبوكية للشخص بدت، نِتفِت شات معه حسب الحالة المزاجية ما بتضر، يعني أول مرة بنحكي مرحبا وكيف حالكم، وايش عاملين وين رايحين ووين جايين وكل هالقصص، وع عقولة كتر السلام بقل المعرفة فى ناس متخصصة تسألك كل يوم كيف حالك ايش اخبارك وجديدك، يا عمي هو لحق يصير عندي جديد؟، وازا صار منتا متابع، لازق فى الشاشة 24 ساعة، وازا نزل خبر جديد ما تقلق راح تصيدو صيد عشان تكون الفايز بجائزة اول كومينت، ومن هنا بتصير تنافق بردودك او بتبطل ترد على الشات الا ما ندر وتقول بعقل راسك " إب عن وجهي" وبرواية أخرى" حل عن راسي"، انا وين و هالآآآد وين.

ويا عيني لو حزفت حدا واكتشف انك حزفته، طبعا الكذبة المعهودة:" معلش هاكرز إجا ع صفحتي، مش بالقصد، أكيد في شيء غلط، مش معقوول أنا برضو احزفك انت اعز الأعزاء".

فيس تو فيس

وشوية شوية بتزيد خبرة البني آدم في النفاق الفيسبوكي، نتيجة تطور الموقع، تلاقي فلان نجح وفلان تجوز وفلان خلف، وعيد ميلاد الليلة مين، وفلان "غير حالتو الشخصية – إينجيجد ناو تو "، يبقى لازم نروح نبارك ونرش الحيطة تهاني وصور دِبل وورود وبلالين، وازا على اقل تقدير ما حطينا لايك على الحالة، معناتو في اشي غلط، وجواتنا سواد تجاهو ومش حابينلو الخير، يا اما مش مهتمين نبارك، وبيجي الشخص بسألك انت ما شفتش التغيير عصفحتي، طب ليش ما عملتش كومينت، والله مستني رأيك مخصوص، ف من اولها بتحمل حالك وبتاخد سيارة طلب بخمسة شيكل عبروفايلو وبتعمل اللازم والله يسهل عليك، نافق تفاديا لوجع راسك.

وتلاقي ناس غريبة عالفيس بوك لسا مش مستوعبة اللي بصير مسمية حالها: "أميرة ومهريغالي، ودموع الليلة الأخيرة، دلوعة فلسطين" و بخصوص دلوعة فلسطين يعني مين حطك دلوعة على ربوع وطنا وكيف وصلتي لهالمنصب ومن وين كل هالثقة وتلاقي 3000 شخص مضيوفين عندها، و لا اللي اسمه "فارس بلا جواد" تاه منك الجواد مثلا و لا انسرق، ولا خجلان تحط اسمك عالشبكة؟

وناس عجب العجاب، تفوت عبروفايلهم تلاقي 500 شخص كلهم أجانب، اوخ، ايمتا عرفهم هدول؟، طب بلاش ايمتا عرفهم، وين عرفهم؟، إزا طول عمره لازق بالبلد، وهالصنف بتجمعو صفات مهمة عالفيس أهمها انو مش فاهم اشي داخل الفيس لانو كل الناس عندها فيس بس، فبالتالي الخصوصية تعته في أدنى درجاتها وكل حركة بيعملها مرصودة، وانت متابع ايش بكتب وكل شوية "فيفا فلسطين" ماهو مش حافظ غيرها، والسؤال ليش ضايفهم، ملكاش تعرف.

وحتى لما تشوف الشخص عالطبيعة بتصير حاسس انك زهقان منه، وبالعافية بتحكي معه عشر دقايق لانو فش حكي أصلا تحكوه، وبهيك بتنتقل من مرحلة النفاق الفيسبوكي بالعالم المفترض إلى مرحلة النفاق الفيسبوكي فيس تو فيس.

وهيك بتصير متمرس نفاق مفترض، ومع ذلك في ناس وأصدقاء بتلاقيها عنجد فاهمة ايش يعني فيسبوك، استخداماتهم متعددة، مش بس للحكي و البرم اللي مالو فايدة، بتحب تحكي معهم، تشوف ايش بيعملو، تستفيد من تواجدهم بأشكال عدة لأسباب بترجعلك او بترجعلهم وجودهم عبروفايلك أبدا مش وجعة راس مش محتاج تنافق عشان تثبتلهم محبتك وترحابك فيهم .

حملة إقطع و اربح

2011-08-10T07:52:00.000-07:00

القطع بغزة خلال الشهر الفضيل برعايـــة:
1- الاتصالات الفلسطينية - جوال
2- شركة توزيع الكهرباء
3- مصلحة المياه ،بلدية غزة 4- جيش الاحتلال الاسرائيلي
5- شركة حضارة للانترنت

إذا كان عندك إرسال، أرسل إضافة واحدة للقائمة برسالة على الرقم 37888 و اربح معنا دولة بأيلول ..

قطعت الكهربا

2011-08-09T02:36:00.000-07:00

الخبر اللي تصدر عناوين الأخبار الفلسطينية امبارح كان من تخوف عمال شركة الكهربا من الدواعي اللي بيدعوها مليون و800 ألف مواطن في غزة عليهم، فبمجرد إنو الكهربا تقطع بيبدى سيل الدعاوي اللي كلنا صرنا نحكيها بوعي وبدون وعي، زي هيك:

"الله يقطع إيدو اللي قطعها، الله ينزلو فى قعر جهنم اللى نزل السكينة، الله يقطع رحمتو عليكم يا تعون الكهربا، نشوف فيكم يوم عتمة زي ما عتمتو علينـــا".

وطبعا عمال شركة الكهربا خايفين من انو هاى الدعاوي تصيبهم أو تصيب عائلاتهم، وأنا هنا بدي أوقف وقفة مع المواطنين وخلينا نسألهم بدون ما نروح نستفتي حد، هو العامل الغلبان فى شركة الكهربا بحكم ع إشي غير عالسكينة اللي برفعها وبنزلها حسب جدول محدد من المسؤلين عن توزيع شبكة الكهربا؟.

طبعا لأ، يا جماعة الأزمة مستمرة من وقت طويل ومرينا بظروف أصعب من هيك كان وقت انقطاع الكهربا يصل 18 ساعة صح؟، طب وأيام الحرب2008 قعدت الكهربا 20 يوما مقطوعة.

بدنا نستحمل بعض بجملة الأشياء اللي مستحملينها بهالبلد، وخلينا نتخلص من هالعادة السلبية، كل ما دقت المية بالكوز وقطعت بنروح وإحنا سالخينهم دعاوي للعمال عليهم وعلى أولادهم، يعني هٌما لو كان في إيدهم يجيبوها 24 ساعة ما كان جابوها، والقطع على الجميع مش عليك إنت لحالك، الأزمة طايلة كل البلد.

بقدر أسباب الجميع، كتير ناس انحرقت عندهم أجهزة، او بيوت أو مخازن، وصعب بهيك وقت نقدر نعوض اللي راح، وكمان انا مش مقتنعة بمبررات شركة الكهربا والسكوت المحلي والوطني على الأزمة اللي كل يوم بتتفاقم.

والفتوة جاءت بعدم جواز الدعاء على العمال في شركة الكهرباء بغزة

وبالمناسبة أول ما الفتوى صدرت لقينا صفحات على الفيس بوك تطالب بإسقاط شركة الكهربا : يا جماعة هو في شركة تانية عشان نسقط الأولى؟

وإزا حبيتو تدعو، إدعو على اللي وصلنا لهادا الحال أيا كان ..

وسؤال تاني: إيش بالنسبة لعمال شركة حضارة؟

*ملاحظة الكهربا عندي قاطعة وانا بكتبلكم هالكلام، ومعنديش قرايب في شركة الكهربا

خلينا نعطيلو فرصة

2011-08-01T00:49:00.000-07:00

قادرين بالشهر الفضيل نكسر اقتصاد المستوطنات لأنو كلنا عارفين انو الاقبال على المنتجات الغذائية بتزايد بشكل مرعب بشهر رمضان.

خلينا إيد وحدة ونعطي فرصة لمنتوجنا الفلسطيني

إلى حاكمة أبو ماريا: ما في بعد كلامك كلام

2011-07-29T06:42:00.000-07:00

والله انك بمليون راجل ومليون رئيس يا حجتي

من هو المُدوِن ؟

2011-07-28T01:40:00.001-07:00

في حوار سريع صار قدامي واحد بسأل التاني:

من هو المُدوِن ؟

شخص دوونجي تبع دواوين ..

عالطريق

2011-07-26T11:49:00.000-07:00

إقرأ القطعة التالية ثم أجب عن الأسئلة:
من أسبوع بالتحديد قررت أنا و والدتي نزور صديقة عمري اللي راجعة من الإمارات ومش شايفاها من ست سنين، ولان المشوار بياخد وقت من غزة لخان يونس، طلعنا بنص النهار تقريبا.
كلشي تمام ووصلنا الحمد لله وتأكدت من انو ذاكرتي شغالة كويس لما عرفت بيت صحبتي اللي اختفى بين العمران وشكل المنطقة تغير خالص، و إحنا مروحين كانت الدنيا مغربية، نزلنا شارع جلال عند موقف غزة، ولقينا وسع في باص هونداي، وقعدنا نستنى السواق على ما يحمل باقي الركاب، وما فيش دقيقتين إلا وشاب ماسك عود دخل الباص وقعد في الكرسي الوراني، وبعد بثواني دخل واحد تاني ماسك دف، وراهم عاد دخل واحد تالت معاه أورج، وانطلق الباص بحمد الله.
بالطريق رن جوال أبو دف: ألووووووووووو
ولك ألووووووووووووووووو
سامعني .. يا عمي إوقف في منطقة فيها إرسال
معلش أنا راكب الميكروباظ ومش سامعك كويس
وقف يا سواق شوية خلينا ناخد راكب
قلت أنا بس الظاهر الرقاصة هلقيت هتطلع أما نشووووف، و مازبطش توقعي وفرقة حسب الله ماكملتش طلعو اتنين ستات ومعهم شاب وركبو ورا في آخر كرسي.
ورن جوال أبو دف تاني:
ألوووووووووو
هلا أبو الشباب، وين أيامك كيف حالك، مبروووووووووووووك، أماااااااااااااااانة، أنا سدااااااااااااااااد
بدك جهاز يعني، وين السهرة، آه عند الأوروبي، بسيطة، في عندي شاب بسد فى الشغلانة، مش بعيد عنك في قيزان النجار ساكن، طب بدك مايكات، اورج لا معنديش الفرقة بتيجي ومعها أورج، آه الحفلة اسلامية، خليني أدبرها وارجع رنلي على رقمي كمان خمسة.
أبو دف بحكي للي جنبو أبو عود: هادي حفلات هادي، أي والله زمان ما كنا ملاحقين حفلات، الناس كانو يتخانقوا على الفرق، علللي يا سوااااااااااااااااق عللي خلينا نسلطن.
و إم كلثوم تصدح ب: "قد إيه من عمري قبلك راح"

أبو عود: يا سلام عزمان ما أحلاه زمن البساطة وكلشي حلو و الدماغ رايق واللقمة مكفية، كنت ادق عالعود بالخمس ساعات ولا اتعب، كان في سميعة أصليين، هلقيت يادوب أطلعلي اربع خمس سهرات في الشهر وكلهم حفلات رقص وهقص، وإيش بيعملو، انت عارف
قاطعه أبو دف: إسمع بالله اسمع ايوة ايوةةةةةةةةة يا عيني : رااااااااااااح تيرارا وعدى يا حبيبي.
يا سواق بدنا ننزل عند موقف جباليا يا حبيبي، يرضى عليك سرعلي هالميكروباظ شوية، السهرة عدها بدت، والسماقية نزلت للمعازيم.
صار السواق يضحك طبعا، وأنا مش مستوعبة بصراحة بقول لإمي حاسة حالي راكبة ميكروباص مصري واللي زاد وغطى طريق صلاح الدين بعطي إيحاء انو انت برة البلد.
نزلو أعضاء الفرقة الموقرين، وانا صرت مركزة مع إم كلثوم إلا والشاب اللي ورا مستغرق في الكلام
مع الستات اللي معاه ويبدولي انه وحدة أخته والتانية خطيبته:
هلقيت بنزلكم عالجندي، أي إيش الجندي، فخم فخم، غزة حلوة ، كل ما اطلع من خان يونس بحس حالي رايح باريس."باريس" :S ، ما علينا نكمل.

خطيبته ردت: يالله من زمان نفسي أنزل عغزة، الحمدلله الله حققلي حلمي.الشاب: ولا يهمك من يوم وطالع أحلى مشاوير عغزة إلك واللي بدك ياه بوظة بجيبلك براد بجيبلك فستق حلبي بجيبلك وبنتمشى كمان فى سوق الرمال، وباخدك عشارع حلو كتير مضلل شجر اسمو شارع العشاق.
عندك بالله يا سواق أيوة عند معتوق يا حبيبي.

السؤال الأول
ما معنى المصطلحات التالية:
1. هقص
2. قيزان
3. يخو

السؤال الثاني:

"ميكروباظ": مصدر ( رباعي – خماسي- إزعاج)

السؤال الثالث:

1. سبب نزول السماقية للمعازيم
2. ما وجه الشبه بين غزة وباريس
3. علل تسمية شارع العشاق بهذا الاسم

The Mystery (اللغز)

2011-07-17T00:29:00.000-07:00

The song is performed by the newly created GYBO rap team and it's dedicated to all the freedom fighters world wide, to all those who raised the Palestinian flag to face zionism and specially to the passengers of the flotilla1, flotila2, flytilla, viva palestina convoys, road to hope convoy, Africa to Gaza, Asia to gaza and to our friends in the vik2gaza convoy.

مين هو عازمكن يا بنات يا ملاحي?

2011-07-14T01:01:00.000-07:00

"مين هو عازمكن يا بنات يا ملاحي?, عازمنا محمد هالشاب الفلاحي"

مقطعين من اغنية شعبية فلسطينية "فاردة - طاحت الخيل ترقص" تقال فى حفلة زواج العريس، او فى الطلبة " حين يذهب اأهل العريس لطلب يد العروس، او لاخذها من بيت ابيها إلى بيت زوجها، تسأل سيدة عجوز مجموعة من الصبايا الجميلات من دعاهن إلى الحفل.

وقع بين يدي بالصدفة أول أمس دعوة لفرح، وبصراحة من نظرتي الاولى ظننته دعوة لاحتفال بذكرى ما ، فعلي الغلاف الخارجي ثوب فلسطيني وصورة لحنظلة ومفتاح العودة وبالداخل دعوة من والدي العرسان توضح أصل كل عائلة مهجرة منهما ويطلب اصحاب الدعوة من المعازيم ، الحضور بالزي الشعبي الفلسطيني الثوب و الغطرة ..
خطوة بسيطة جدا في اتجاه تعزيز قيمنا وعاداتنا وتقاليدنا التي شارفت على
الاختفاء في عصر السرعة ..

العشرة بتهونش

2011-07-07T09:32:00.000-07:00

في رحلة تدوينمن 2006 لم أبكِ وأنا أكتب أبدا إلا في تدوينة لم أنشرها على مدونتي كانت في وداع أختي سرين منذ ثلاث سنوات، وها أنا الآن وللمرة الثانية أعترف أن بداخلي غصة منذ الصباح تدفعني لأن أكتب وأبكِ في آن واحد وبحُرقة، بفعل فاعل او بصدفة من الله رأيت اسم صديقة وأنزعج جدا حين أقول عنها صديقة هي بالذات لأنني طالما اعتبرتها أختي وأعرف أنها تعتبرني أختها أيضا، افترقنا منذ أشهر بعد سنوات من الصداقة، ورغم أننا افترقنا لا أستطيع استيعاب الموقف ككل كلما فكرت فيه.

مرَ شريطٌ من الذكريات أمام عيناي وعلى مدار خمس ساعات من هذا اليوم الطويل، مواقف مفرحة محزنــة وحتى مبكية،أحاديث وأحداث كانت بيننا، في آخر مرة تحادثنا بعد خصام صغير احتضنتها وبقوة، هي بكت وجعلتني أبكي أيضا قالت لي:" يالله بحبش هادي المواقف أنا والله إني بحبك"، أتدرون لا أعرف لماذا احتضنتها كان ربما على أن أكتفي بالسلام عليها، ولكن حين أفكر في الأمر الآن أشعر أني فعلت ذلك لسبب كنت أجهله: أن ذلك وللأسف سيكون الوداع الأخير بيننا.

في رمضان الماضي، زرتهم على عجل قبل الافطار ولا أذكر لماذا، ولكن حين هممت بالنهوض، أخذ أباها بالحلفان:"وين يا عمي، عليا الطلاق ما بتطلعي إلا تفطري عنا"، على طاولة السفرة أخذنا نضحك بهستيريا حين جاءت سيرة النسويك والمسكافيه والفليزر وتذكرنا صديقتنا الثالثة الحبيبة، أذكر ليلة كنا مستاءتان من شيء تحدثنا عبر المسجات على الفيس بوك، ومن حديث لحديث وإذا بها تقول:"رندة أمانة خليكي، أنا مرتاحة وأنا بحكي معك"، كيف لا والأخوات فقط هن من يرتحن في حديث الفضفضة وما من شيء أحبُ إلى قلبي من الحديث معك

في عصر يوم ذهبت معها لبيتها لتتحدث لأهلها الذين سافروا، دخلت أنا إلى المطبخ لأعد شيء ما نأكله، وبعد ساعة انتهت هي من الحديث معهم وانتهيت أنا من صنف مكرونة لم اعرف له اسم، خرجنا من منزلها وفي طريقنا حملت انا صينية المكرونة الساخنة جدا بعد ان لففتها ببشكير وحملت هي شنطة ملابس، حدثتها:"علينا ان نسمى هذا الاختراع العظيم بإسم ما، وأخذنا نخترع أسماء عدة، وودت لو أقوله لكم لكني لا أتذكره فعلا ..

وفي أوقات ما بعد العصر كنا ننتظر أبو كلب الشخصية التي أخذت حيزا من ضحكنا لتبدأ مسرحية النكات والتعليقات، و أذكر أكلة السمك التي تسممنا منها جميعا، ولعلها تذكر هي أيضا حين شربنا الكركديه الساخن و أصابتنا حالة من الهبوط جميعا، لم نعد نقوى على الحركة لساعات، وساعات من الضحك المتواصل في اعداد طبق سلطة يوناني ضخم.

وكنا في بعض مرات نعيد نفس القصص حين يتعلق الموضوع بالماضي البعيد أيام جدي وجدها وقصصهم ، وحكاية حشمت، ومنذر الديك الذي مات منتحرا، وحين كنا نتبادل القصص لنقرأها ونروي مختصرها لبعضنا البعض، كانت تقول لنا:"هاي القصص راح تجيب آخريتكم، حتى أدمنت القراءة هي الآخرى"، وفي ليلة دعتني لأبيت عندها أنا وصديقتنا الثالثة ، وافقت دون تردد لأننا كنا في حاجة لبعض الأحاديث الخاصة بين الأخوات، ولكن يا فرحة ما تمت حين اضطررت للرجوع إلى البيت ليلتها"، في مرة لعبنا لعبة الأرقام السرية وحين كتبت لها رقم 100 قالت:" يا رقم 100 انا حاسة انك من الناس اللى راح اتضلها معي طول عمري"، ولا أنساها مرات حين كنت أذكر لها استيائي من شخص ما كانت تقول لي:"بتعرفي مش أنا ما شفتوش بس كرهته من كلامك لأنو مؤذي"

وأنا أكتب لكم الآن لدي مزيج مختلط من الأحاسيس أفضل ألا أكتبه، ربما وصل لكم بالقراءة، لا أحب أن أقص عليكم النهاية ولكن أشتاق إليها جدا وأعتقد أني لو رأيتها سأجلس لأسبوع أتحدث إليها دون ملل، لازلت ورغم اننا افترقنا اشعر بفراغها، ومكانتها داخل قلبي لم تنقص ملم واحدا، و العشرة بتهونش إلا على ولاد الحرام..
رُبَ أختٍ لم تلِدهــا أمي، دامت في القلبِ رفقتها، عَزت علي فُرقتــها

حيث استحالة الغياب

2011-06-29T01:04:00.000-07:00

التدوينة العاشرة ضمن حملة "دون" التدوين اليومي لشهر حزيران

سألته بهدوء: "أين أنت الآن، مسافر بطائرة كالعادة، أو تحط رحالك بأرض ما أم في عرض البحر
أجابهـا: "في رحلة بحريـــة".
قالت له:"جيــد"، ثم أغمضت عينيها، وفي سِرها قالت: "كاذب"
"أنت في قلبي الآن وقبل وبعد، حيث استحالة الغياب والسفر"

ما يقلب فينا ويخلص

2011-06-20T23:45:00.000-07:00

التدوينة التاسعة ضمن حملة "دون" التدوين اليومي لشهر حزيران

يسعدلي صباحكم ..

تدوينة صباحية على غير العادة ..

قبل شهرين من هلقيت كنت رايحة أقدم لوظيفة في جامعة غزة وفي المقابلة الرابعة، تخيلو قابلو المتقدمين أربع مرات، طلعت من بيتي الساعة 9 ع أساس الموعد تسعة ونص، والجامعة مش بعيدة كتير أول حي الزتون، بدها مواصلتين ركبت سيارة من بيتي لشارع الصناعة، ومن الصناعة للزتون، الكراسي اللى ورى بالسيارة كان قاعد عليهم ركاب، فأنا ركبت جنب السواق، السواق عشان تفهمو عليا منيح اللي جاي لازم اشرحلكم كينونته، رجل فى حوالي الخمسين من العمر الظاهر انو سلفي من العمة اللى لابسها، ولحيتو الطويلة، نزلو الركاب عند أخر شارع الصناعة، وكمل السواق الطريق لجامعة غزة، فجأة وخير اللهم اجعله خير، لقيتو بقرأ قرآ بصوت عالي، وبسرعة بسرعة، نازل تجويد،وهاتك يا قراية في سورة البقرة، ويعيد في آيـــة معينة يمكن خمس ست مرات .

أنا طبعا ما حطيتش منطق على قولة سعيد صالح، كل الأفكار السودة اللي فى الدنيا إجت ب راسي

1. هو الصاروخ هينزل إيمتـــا

2. معقول السيارة مفخخة وهتنفجر فينا

3. السواق هادا مجنون ووقعتنا طين

يا بيي ما اعطلها هديك اللحظة، بيني وبينكم قعدت أتشاهد، إنو ولا فكرة منيحة إجت ببالي، وطبعا السيارة ماشية وقف السواق قدام كلية المجتمع وركبو 3 منقبات ورا، سألهم يا بنات بتعرفوش تحكو تحية ودعاء الركوب، ولا وحدة ردت عليــــه، قام قالهم سنن الرسول قراء دعاء"سبحان من سخر لنا هذا وما كنا له موقنين"، وبدا درس العقيدة السواق، طب يا بنات وحدة فيكم تحكيلي ما هو دعاء الخروج والدخول من البيت، ولاوحدة ردت، السواق إنصدم، معقول يا بنات لا تعلمن الدعاء، بنبعتكم عالجامعة تتعلمن، هذه أساسيات من المفترض إن تحفظنهــا..

و الحمدلله السواق وصل ونزلت أنا قدام الجامعة، والسؤال اللي بطرح نفسه السواق ليش قعد يقرأ قرآن بالطريقة المرعبة هاى؟.

نَصٌ لَن يُكتبَ أبداً

2011-06-18T10:01:00.000-07:00

التدوينة الثامنة ضمن حملة "دون" التدوين اليومي لشهر حزيران

نَص لَن يُكتبَ أبداً:

كي نكمل المسير

كلٌ في مداره

ليس من داعٍ

لأشواق مشتعلة

تحرقُ الأخضرَ واليابس

من الآن

سأكونُ برداً وسلام
اليومَ أشيعك

وسأقرأ الفاتحة كخاتمة

أرقد أيها القلب بسلام
مُت كي أحيــا مع الأحياء

نص لـِ رندة أبو رمضان

اضحك مع أمن الدولة

2011-06-17T10:56:00.000-07:00

التدوينة السابعة ضمن حملة "دون" التدوين اليومي لشهر حزيران

آخر أيام صيف 2010، قلت أنزل القاهرة أنا وخواتي نغير جو شوية، وما أحكيلكمش كانت الأمور مسهلة الحمد لله، دخلنا معبر رفح المصري الساعة 7 ونص، وما بين كل الإجراءات الاعتيادية من تسجيل وفرفطت جنيهات عالرايحة والجاية، بدأو ينادو على الأسماء، و هووووووب واحد بينادي : رندة أبو رمضان

وسباق الجري اشتغل، وصلت عندو قالي اتفضلي عند حضرة الظابط مُراد.

وليش الظابط عاد؟، ظابط أمن الدولة قاعد في مكتبو تحت الكونديشين، والمسافرين برة انحرقوا من الحر، عصرت على حالي لمونة استعدادا لاستجواب كالعادة، وفتت لعندو
اسمك ايه؟ رندة أبو رمضان، هي رندة بتتكتب بالألف ولا بتيه ولا بالهاء?، بالتاءالمربوطة، ومعنا اسمك ايه؟, اسم شجرة عطرية إلها زهور بيضا بتنبت في سواحل الشام،

عند مين نازلة يا آنسة؟، نازلة في أوتيل، فين بقى؟، لسا ماحددتش؟، اومال نازلة كده سبهللة، هنزل عند عمتي الاول، جيتي مصر قبل كده؟، اه 4 مرات، طب رحتي شرم؟، لا مارحتش شرم، دنتو الفلسطينية كلكو بتنزلو شرم.

بتشتغلي؟ حاليا لأ، ساكنة فين؟، غزة، أنهي حتة فغزة؟، ما بين حي الشفا وحي النصر، وسيول من الأسئلة المبرمجة اللي تعودنا عليها منهم.

وبعد لحظة سكون طويلة نطق البلبل: يعني إنتي ساكنة جنب عكيلة بتاع الحمص؟

حسبي الله عليك ببالي، لا مش جنبو أنا ساكنة جنب أبو طلال تاع الفلافل، ورجع يتفحص ويتمحص في الباسبور.

طيب يا آنسة تفضلي انت ولما يجيلك الدور هنندهلك، وتفضلت حضرتي فى القاعة أستنى الدور، وصارت الساعة وحدة الضهر والناس بتعدي والمعبر عمالو بيفضى، صارت الساعة 5، مش باقي غير احنا و 6 أشخاص، وصلت الساعة 7 لقيت الظابط مٌراد اسم الله عليه جاي وفي ايديو الباسبورتات وبيقولي: حضرتكم هترجعو معلش، بقولو ليش طيب؟، ردلي بنص عين: أصل انا بحب فلافل عكيلة أكتر من فلافل أبو طلال.

ورجعنا نجر أذيال الخيبة معنا، وياريت على هيك، بعد 3 شهور إمي سافرت على الامارات عند اختي، في المعبر بردو طلعلها الظابط مُراد، والطامة الكُبرى كانت لما سألها بعد فحص ومحص بالباسبور: مش حضرتك مامت رندة، هي مش مسافرة معاكي ليـــــه.

رُب مدونة خير من ألف ميعاد

2011-06-10T10:14:00.000-07:00

التدوينة السادسة –ضمن حملة "دون" التدوين اليومي لشهر حزيران

زوار مدونتي الأعزاء أعتز فيكم كلكم فرد فرد، اليوم اخترت تكون تدوينتي عن صديقة تعرفت عليها من خلال مدونتها المصرية بنت بلاد النوبة مها مختار أو مهاميهو متل ما بتحب الكل يناديها، 4 سنين عمر صداقتنا من أيام ما انا كنت أكتب فى مدونتي القديمة، وأنا فخورة جدا إن الصدفة أخدتني لمدونتك "أحسن تستاهل" يا ميهو، وميهو اللي تعارفي عليها كان الكترونيا للاسف عبر المدونة وعبر التليفون و المسجات، أكاد ان أجزم بأنها أقرب الأشخاص اللي بيعرفو رندة وبيفهموها حتى لو متكلمتش.

ميهو بشهامت البنت الجدعة المصرية، وقفت معايا يوم ما احتجت أشتري بضاعة لمحل الملابس اللي كنت مشتركة فيه، كلمتها وبدون تردد قالت:"طبعا يا رندة موافقة، أنا عشانك أعمل أي حاجة"، ميهو نزلت ولفت السوق والمحلات واختارت الديزاين وفاصلت فى البيع وووو ..

ولما صحبتي سافرت مصر رجعت محملة بهدايا من ميهو ليا وصدقيني يا مها انى وانا بقرأ في الكارت اللى بعتيه وبتأمل في هديتك، حسيت ان المثل اللى بيقول: اللي بعيد عن العين بعيد عن القلب هو أكبر كذبة فى العالم، و عمر الحصار و الحدود ما بمنعو الناس تتواصل وتحب بعضها.

مقدرتش أشوف مها حتى اللحظة، نظرا لظروف المعبر اللى كنت كل مرة اروح وارجع فيها، لكن صداقتنا ملهاش حدود، بس ان شاء الله إلنا لقاء في النوبة زي ما اتفقنـــا ..

ألف سلامة عليه

2011-06-05T03:49:00.000-07:00

التدوينة الرابعة –ضمن حملة "دون" التدوين اليومي لشهر حزيران

اليوم الصبح نزلت الصيدلية أشترى معجون سنان، دخل الصيدلية ولد عمرو 8 سنين، وبيحكي للصيدلي عمو في عندك بلاثتر "بلاستر" ؟

الصيدلي حكالو آه في عندي بدك من الحجم الكبير ولا الزغير ؟، الولد مافهمش

الصيدلي جابلو ياها بطريقة تانية: يا عمو يعني الجرح اللي بدك تحط فوقو البلاستر كبير ولا زغير، بردو الولد ما فهمش

الصيدلي: مطول روحو على الاخر: عمو إنت لإيش بدك البلاستر، الولد ما فهمش وشكلو مش عارف اصلا

الصيدلي زغرت روحو: ولا مين اللي باعتك عليا P:

الولد: مث عارف لإيث، بث ماما قالتلي روح هات بلاثتر للابتوب.
وتجدر الاشارة الى انو كتير من الصبايا بخافو من اختراق اجهزتهم وتشغيل الكاميرا دون علمهم من الهاكرز متل ما انتشر بالفترة الاخيرة ولقو الحل الامثل بوضع بلاستر فوق عدسة الكاميرا

تدوينة للبنات فقط ..

2011-06-04T13:56:00.000-07:00

التدوينة الثالثة –ضمن حملة "دون" التدوين اليومي لشهر حزيران
محلاها لمة الصحبات واللي بيتخللها نشرة أخبار بدون فواصل إعلانية و موضوع الحديث الرئيسي عن العرسان، فعليا الموضوع هادا يا بقلب بنكد في آخر القعدة يا بقلب بضحك هستيري من القصص اللى بتنحكى، ماحدش يحكي لأ مش صحيح

لأ لأ صحيح ونص و تلات ترباع، إلا هي تلات ترباع كيف بتنكتب ؟

مش مهم، ماعلينا، طبعا بتلاقي البنات فى القعدة هاى بنقسمو 5 أنواع، نوع اتجوز وريح بالووو وبصير يحكي بالاطلال، ونوع صانت كدة ومطرطق ودانه عالاخر راح يحكي قصة وحدة بس، ونوع بيضل يبرم يبرم يبرم فى مغامراته، ونوع لا حول ولا قوة الا بالله ماحدش سائل فيه يا إما راحت عليه، يا إما فش أمل فيه، مهمته فى القعدة الضحك على اللي بينحكى .. ونوع خامس عامل حاله ولا عباله الموضوع ..

إنو يا جماعة الخير راعو مشاعير خواتكم شوية اللى قاعدين، أبداااااااااااا، والوساوس فى دماغ كل وحدة شغالة، وكل وحدة بتعد للتانية القصص اللى حكتها.

ما تضحكوش ولا تستتفهو الموضوع، لأنو قد ما تعلمنا وتثقفنا و كبرنا، قصة النص التاني راح تشكل دايما نقطة وقوف في حياة كل منا، وشعور الخمسة اللى في القعدة شعور طبيعي جدا،والكلام اللى بحكيلكم ياها هو فعلا اللى بصير، انا مش جايباه من المريخ, و انتبهوا إزا ما كنتوش من الخمس أنواع هدول معناته في اشي غلط بصير معاكم,

أو انكو بتكونو من النوع السادس :P

في مرة كنت بحكي مع صحبتي عن انو كل اشي مقدر وماحدا بياخد الا رزقه اللي مكتوبلو سواء بشغل بدراسة بزاوج او اى اشي تانى، المهم يا جماعة اختنا في الله اتقدملها عريس وعلى رأي ستها اشي و اشي، مهندس وابن ناس محترمين وساكن برة ومدرس بالجامعة وفيه كل المواصفات القياسية لمجتمعنا تبع المناظر، المهم صحبتنا لبست وتأنتكت وحضرت حالها لاستقبال أهل العريس، وفي اليوم الموعود إجت امه لامة اللمة من اهلو وقعدو، وطبعا حسب السيناريو العالمي، طلعت البنت حاملة كبايات العصير ، حطت الصنية عالطاولة وقعدت جنب امها زي الحمل الوديع ..

الام: واللهي بنتنا تقدملها كتير وقليل بس النصيب، وانتى عارفة مش كل من دق الباب بنفتحله

ام العريس "مبسوطة انو الباب انفتحلها": اه طبعا طبعاا مشالله عليها قلبي انشرحلها من ساعة ما شفتها، أنا ابني اهم اشي عندو الاخلاق والعلم والاصل، باقي الحاجات ما بتعبي عينو

وهكذا وصحبتي سردتلي فى احداث كلكم عارفينــها ما بين مد وجزر، وبعد س و ج مفصل و امتحان شفهي بين ام العريس وام العروس، قررو الجماعة الحمدلله يقومو يروحو، وعند الباب سألت ام العريس عروستنا الحلوة: انت لابسة كعب ؟

البنت بكل ثقة قالتلها :اه لابسة كعب، هيووو وورجتها ياه..

ام العريس مشالله عليكي قمررررررر ..

وبعد اسبوع صحبتنا كانت فى لمة من اللمات اللى قلنا عليها فوق، وتسمع من صحبتها انو اتقدمولها نفس الناس وراحو ما رجعوش علشان العريس ما بدوش وحدة يحطها مدالية على جنبو.

إتمسو بالخير ..

نشفان ريق .

2011-06-01T11:38:00.000-07:00

التدوينة الثانية –ضمن حملة "دون" التدوين اليومي لشهر حزيران
كنت مرة بحكي مع صديقتي بيسان جابر من الضفة الغربية عن كيف نستلهم الأفكار للكتابة، وتشابهت طرقنا الأسهل، وكانت تاكسي الأجرة ..

تاكسي الأجرة الملهم الأول لأي حد ناوي يكتب تدوينة بفلسطين، لأنو بمجرد ما تشاورولو ويوقف وانتو تركبو، أكيد كلكم بتحسو متل ما بحس، بتدخل عالم الأخبار، ومتل ما السواق بيقود السيارة بردو السواق بيقود مبادرة الموضوع اللى كل السيارة بتصير تفتي فيـــه، وكلام السواق منزل من فوق ومن المسلمات، يعني لو جادلتوه أجاركم الله، هادا غير القصص والأخبار اللي بتسمعوها واللي ممكن تصير وتربطو المعلومات اللى بيحكوها الركاب والسواق وبالنهاية تصلو للشخص، لأنو غزة أصغر من خرم الإبرة .

من أحدث المواقف وأطرفها بقصة التاكسي معي ، من إسبوع تقريبــا كنت نازلة الصبح رايحة شغلي، وقفت على خط شارع النصر وشاورت لسيارة وقفت، قلتلو عند "قصر الحاكم" شاورلي إنو أطلع ..

ولما السيارة مرت من قدام مستشفى الشفا، كانت المنطقة ملغمة شرطة مرور، يمين وشمال

صار السواق يناجي الله، ع اساس مش مأمن ولا مرخص، وهالسيارة ماشية وعدى من قدام مرور غزة باتجاه جامع العباس، إلا السواق وقف لواحد معرفته اللي بالصدفة طلع شرطي مرور.

بعد موال السلامات والكلامات اللى قالوه، والسيارة ما تحركت سم واحد لأنو رمزون العباس صار اشي بخنق بصراحة، وصلنا للمهم

السواق : مالكم يا جماعة منتشرين

الشرطي: والله منا حابب هالشغلة انسطلت بالشمس، بس الرزق يا ابن عم

السواق : الله اللي سترنا بس عدينا من قدام الشفا

الشرطي: شكلك مش مرخص

السواق: متلي متل غيري هو انا احسن

الشرطي: اللي إلو معرفة بغلبش بالمرة

السواق: في واحد قريبنا بس تقول يالله قديش بكرهو

الشرطي: ليكون الشرطي اللى قدام الشفا، أبو نضارات ؟

السواق : لا لا بشتغل عن رمزون السرايا، شفت انت كيف ام جهاد منشفة ريق الناس

هو اكتر منها , ولا بكرم لحدا، عالطالعة والنازلة بوقفنا وبسلخ مخالفات

الشرطي: يمكن لو شفته بعرفه

السواق: صدقني لو يصحله ليعمل حملة "هيا ننشف ريق السواقين" ضدنــا ..

أهلا

2011-05-31T11:50:00.000-07:00

بنادول اكسترا مرحبا

الشريط الذي طلبته خلص حاليــا، الرجاء اخبط راسك بالحيط

Sun sun

2011-05-27T02:07:00.000-07:00

I tried to call the Sun this morning & there is no answer, maybe she is out with her kids to the mall :D

أنا و اللي صاير

2011-05-22T04:14:00.000-07:00

مش متأخر ولا إشي ، بس لازم أحكيلكم إنو يوم نزلت على 15 آذار للشارع عشان أطالب بإنهاء الانقسام كان يوم تاريخي، أنا عمري يا جماعة الخير ما شاركت بمظاهرة، ولا مشيت بمسيرة أبدا أبدا.

وأنا ماشية من بيتي لمكان التجمع فى ساحة الجندي المجهول، حسيت إني طايرة، انا رايحة أتظاهر، يا سلااااام، معقول إجا اليوم اللي الشباب في بلدنا صارو ينطقو وطلعلهم صوت كل الدنيا بتسمعو، كل واحد من الموجودين كان رايح لهدف، انا وانا رايحة كنت براجع مجموعة أهدافي، أيوة يا رندة ايش بدك بالزبط من المظاهرة هادي، ركزي استجمعي افكارك ايوة ايوة بالزبط :

انا بدي أمشي بالبلد مش خايفة من حدا

انا بدي بلد ديموقراطي

انا بدي أحكي اللي بدي ياه

انا بدي معابر مفتوحة

انا بديش بطالة 6 شهور ب 1000 شيكل

انا بدي اشتغل بمجال دراستي

انا بدي اسدد قسط الجامعة اللي عليا من 4 سنين

انا بدي كهربا 24 ساعة

انا بدي مية نضيفة

أنا بدي أبويا يرجع ع وظيفتو

انا بدي نتحرم بعض

انا بدي دار جيرانا ترجع تتعمر

وبدي قرايبنا الاسرى يطلعو من السجن

"كل هدول يا أنانية بدك ياهم" إيش خليتي لغيرك؟، ماهو التظاهرة هاى عشان أطلب هالمطالب إللي ولغيري، هو انا لحالي اللي هيك يعني؟، نص مليون شاب وشابة فى البلد نفس وضعي و أسخم والحمد لله .

وجريت الأحداث بسرعة بسرعة وهيهم تصالحو مشالله عليهم الأخوة بفعل فاعل إيش هو الله اعلم، بدناش إنشكك فى النوايا، بس انا بحذركم تحذير شديد اللهجة، انتو يا جماعة الخير ياللي تصالحتو، وياللي ناويين تمسكو البلد، وتصلحوها إياكم ولعنة الكراسي ، واتذكرو انتو بمواقعكم اللي صرتو فيها هلقيت جايين عشان تزبطو الأمور وتصير جنة جنة جنة يا وطنا ..

إحنا الشباب بصراحة فاض فينا يعني وبصراحة اكتر إحنا قاعدينلكم بالمرصاد و مستنيين إلكم على نقرة، الله لا يجيب النقرة، وبوعدكم وعد إزا هالنقرة هاي إجت سايبالكم إياها مخضرة على قولت ستي ، خودو الجمل بما حمل بس قبل ما أسيبها انا وغير اعرفو انو التاريخ ما راح يرحمكم ولا الناس ومش راح تقدرو تعلقو خيبتكم على شماعة الاحتلال واليهود ، وبرجع وبقول انا مش بحبطكم أنا جاية اعرضلكم عينة من الإحباط الموجود عنا كلنا إحنا الشباب، ليش راح نسيبلكم ياها؟ إزا خربت

لأنو كل واحد بطمح بمستقبل أحسن وإحنا ضيعنا كتير من عمرنا نستنا هالحلم، ومش على استعداد أبدا نضيع اكتر من هيك، وإزا مش مصدقين إنزلو اسألو أي شاب او شابة في الشارع عن هيك، صدقوني الجواب واحد

"باسبوري معي، والمستقبل قدامي".

راحة البال

2011-05-21T03:36:00.000-07:00

يمسيكم بالخير ،،

واحنا زغار من زمان زمان يعني، محنا الحمدلله هلقيت كبرنا ، مش انا لحالي ونتو أكيد معي، كنا لما ييجو عنا ضيوف وخاصة جمعة ستات ويقعدو يبرموووووو يبرمووو ومليون قصة وحدوتة، و إيش ومين و كيف وليش ،ويلا ومعلش، وكل حدوتة تنتهي بنفس الكلمة : "اهم إشي راحة البال".

طب هي راحة البال يعني الحل السحري اللي بتحل المشكلة ولا تكونش ابرة مسكن؟ كنت اسأل حالي من وين بشتروها وبقديش؟ ليش الستات العواجيز بضلهم يحكو نف الكلمة ..

بس يا جماعة القصة مش سهلة طلعت، راحة البال هاي مش اى حدا بقدر عليها ..
قولكم راحة البال من وين نجيبها وبقديش .. ؟

سؤالٌ و مقهى ..

2011-05-19T10:50:00.000-07:00

لِ رنـــدة أبو رمضان ..

مُنذُ تجمدت الأمور، وتوقفا عن ذكر اسميهما لبعض، وهي لا تشعُر بشيءٍ حَولَها أبَداً، هِي ليست فاقَدةً للوَعي، بل تترَنحُ كَسَمكةٍ أُخرِجَت لتَوِها من الماء تتقَبَلُ عالماً ليسَ لها أن تَعيشَ بِه، تَصحو أبكَرَ مِما اعتادَت، تَجلِسُ قليلاً على جهاز الكمبيوتر الخاص بها، تفتحُ خانة الرَسائل، لِتكتبَ لَه عن كُلَ ما مَرَ بها باليوم السابق، وكيفَ أنها لا تريدُ شيئاً مِنهُ سِوى أن تَطمَئِنَ عَليه، وتظلُ مُسترسِلةً في الكِتابة إلى أن تستيقظَ بها روحُ التعقلِ مُمتزجةً ببعضِ الكبرياء، لتمحو الأسطُرَ كُلها.

تخرُج لعمَلها مُسرعة لا يعنيها إن كانَ الجوُ حاراً أو ممطراً، فلقد جربت الجَوَينِ معاً حين بكته، ويمضي اليومُ دون شيء تحمِلُ حقيبتها فى السادسةِ مساءً لتلتقي برفيقةِ دَربها حنين في مقهى أمامَ الشاطئ تُراقِبان الغروبَ سوياً، أحبتا المقهى منذُ سَكَنَ الوَجع روحَهٌما، كثيرا ما حاولتا تغييره، إلا أنهما يعودان إليه في كُلَ مرة، جاءهما النادل مُحملاً بما تحبانه، استعجبت حنين لنظرة صديقتها حين حملقت في فنجان شايها،ماذا هُناك؟.

أجابتها بنصف ابتسامة ونظرتها مسلطة إلى النادل: أريدٌ قهوة سادة من فضلك.

أخذت حنين تُقلبُ فنجانها ببطيءٍ أكثر مما اعتادت، أردفت: على الدوام كنت تعلنين عداؤكِ للقهوة، فما بالك اليوم تطلبينها مٌرة؟، أجابتها:" ليس هُناك ما يمنع أن أشربَ قهوتي مُرة، فمحاولاتي البائسة لنسيانه يومياً أكثرَ مراراً من أي فنجان قهوة".

لم تجد صديقتها شيئا تجيبها به، أخذت تخترعٌ لها الأحاديث والأخبار، حتى جاء فنجان قهوتها لتعبق رائحته بالمكانِ، "حسناً هل انتهيتُما أم ماذا، إنك تهذين بما لا أفهم كلَ مرة، والآن هل تبدئين شرح الموقف لي"، أخذت رشفةً من فنجانها وقالت:"ليس هُناكَ من داعٍ، تعلمينَ جيداً أنني ما كٌنتٌ يوماً لأبوح بأي شيِ عنه، حتى لكِ، وأنا آسفةٌ لِهذا".

"لا عليكِ، فلَسنا صديقاتُ الأمسِ لأعرفك، لكِنني كٌلما نظرتُ إليكِ، أقولُ لنفسي تَباً متى ستعودين لينُ التي أعرفها، زمَت طَرَفَ شفتيها لتسأل:حقاً وهل تغيرتُ كثيراً؟.

ليس كثيرا، عدا أنك ما عٌدت أنتِ.

أخذت تضحكٌ كالأطفال، بينما صديقتها تُحَملِقُ بها، وقد ظنتها قد جُنَت، :هيا لندفع الحِساب قبلَ أن نُغادِر.

أمسَكت يدا لين بيد صديقتها تَحُثُها :لا دعينا قليلاً، ليس هُناك من يَنتظرُنا على أيةِ حال، وتابَعَت:هل سَمعتِ يَوماً عن عواطف مُجمدة؟

هل عُدتِ لجنونكِ مٌجدداً ؟

تباً لكِ لستُ مجنونـــة ، هو لم يجرحني يوماً ،هو رجلٌ حقيقي

أطرقت حنين رأسها إلى الأرض قليلاً، وقالت : يبدو أنَ احتفاظك بالأسرار نِعمةً إلهية لي، سمعتُ عن فاكهة ولحوم مجمدة، أما العواطف المجمدة فهي المرة الأولى.

تابعت حنين: لكنها نقمةُ علي، وهل سَمعتِ أنتِ عن مٌحكمة للعابثين بالقلوب .

لا ولكني أعلمُ تماماً أن العَــبث بالقٌلوب أســوَأ جَــريــمَة لا يُعــاقِـب عَــليْهَا القَانُون.

هيا بنا قبل أن أرمي بكِ من أقربَ ميناء.

حَمَلتا حقيبتيهِما، وكلٌ منهٌما، نادمَة على سُؤالها للأٌخرى، وما زالتا تَلتَقيان مساءً على ذاتَ الطاوِلة، لكِن دونَ أسئِلة.

سر النكبة العظيم

2011-05-16T00:33:00.000-07:00

صباح الخير ،،
كل سنة بتمر ذكرى النكبة على شعب تهجر من أرضه زيها زي اللي قبلها، ولا اشي فرق، بس هالسنة كانت غير، مش متل البعض ما قال، لمجرد انو هاى اول مرة الشعب الفلسطيني يطلع للحدود ويتجاوز كل الخطوط الحمرا للتماس مع الاحتلال فى كزا بلد لبنان سوريا، وحتى جوااا فلسطين بالقدس بالخليل بال 48، وماننسى الفضل بعود للناس اللي دعت لانتفاضة تالتة والصلاة المليونية لنصرة القدس وتأكيد حق العودة..
نرجع لكلامنا
اول مبارح كنت بتفرج على فيلم باب الشمس الفيلم لمخرج مصري تصور في لبنان وسوريا عن قضية الفلسطيني كبني ادم مش منطلق قضية سياسية وصراعات، الصراحة الفيلم هادا لازم يتدرس فى المدارس، لانو مناهجنا اسم الله عليها، مش كفية ولاموفية حق النكبة ، من أول الفيلم بتبدا تاخد معلومات عن طريقة حياة الفلسطيني البسيط وتقاليده وبعد شوية الاحداث بتصير تجري لنوصل لأول مخيم للاجئين في التاريخ مخيم شعب الجليل، واللي كنت اول مرة اسمع عنو بحياتي بفضل المنهج الفلسطيني التحفة، وبنصحكم كملو الفيلم المكون من جزئين ..

وامبارح على وجه الخصوص كلنا شفنا فيديو لأهالي قرية مجدل شمس اللي تهجرو من بلادهم بفلسطين كيف وصلو الحدود ماهمهم تحذيرات الالغام ولا الاسلاك المكهربا، مشيو بنفس الطريق اللي تهجرو فيهم بس بفارق الاتجاه، وكيف الناس على الجهة التانية من الجولان صارو يكبرو و يهللو انهم وصللوهم ومش خايفين من البعبع، في مشهد وجع قلبي وقب من شافو وقليلة عليه الدموع، مشهد بينفي مقولة بن غورين الصهيوني " الكبار يموتون و الصغار ينسون " .
وفي مصطلح غزاوي جُح لما بدا نبهدل حدا بنحكيلو :"روح الله ينكبك"، وبما انو كل اشي اكيد مستوى من اشي اخر، واضح انو مفاهيم النكبة ترسخت لاعماق اعماق اعماقنا، وانك تدعي بالنكبة على حدا اذن انت بتتمنالو عيشة تعيسة بلا ولاشي وبعيد عن كلشي محروم ومهضوم الحقوق وهيك هما اللي تهجرو من بلادهم 1948 ..

فاصل غنائي- ما يطلبه الموظفون:

2011-05-10T04:16:00.000-07:00

ولك على عتبات البنك قعدنـــا
,وقدام الصراف صلينا و سجدنا
وقالنا فياض في راتب ووعدنــــا
ونحنا صدقنا متل المهااااااااااااااابيل

لقمة بالبيبت ماعدنا، وحاج اتطعمو ولادنا بسيرة الوطن

ياااااااااااااااااااااااااااابا

ولك قالو الوطن، وفدا الوطن
كزبة الوطن وهالوطن ما بدنــــا
هاتو الراتب وخدو كلشي حتى بلدنـــا
اوووووووووووووف يابا

وين الراتب فش فش

غزة أجمل..

2011-05-07T02:54:00.000-07:00

مش قصة مكانس وكريكات لتنضف هالبلد ..

Deep freeze

2011-05-05T10:31:00.000-07:00

?Is it possible to freeze the Longing

إليك وحدك ..

2011-05-04T11:21:00.000-07:00

أعرف جيداً أنك تراني هاهُـنا ..
قد أكون بشرق وأنت بغرب، لكن هذه المساحة الصغيرة هي التي تجمعنا الآن ..
لا أخجل أن أقول بأني أشتاق إليــــك
اشتقت لصوتك الذي يأتي من بعيد محملاً بلهفات شوق ومحبة
اشتقت لضحكتك التي تملأ أرجاء غرفتي وتزلزلها ..
سيدي رئيس الجمهورية
اشتقت لأشعارك كل مساء ..
اشتقت ل "أحبك" التي تنطقها مسرعاُ.. خوفا من أن يسرقها أحد منك ..
اشتقت لتلك الأحاديث الجميلة معك
تلك التي تستمر لوقت طويل، يتخللها;
ضحكات، أوامر، مشاكل
وختامها (أحبك)
قلي بالله عليــك لماذا لا تأتي بالأحلام كما كُنت ..
أشعر بأني أنزف شوقاً لا يتوقف وألماً ليس له احتمال ..
أولا تٌعاقبُ هكذا ..

درس قديم جديد

2011-05-03T01:02:00.000-07:00

مدرسة الحياة

كلنا بنمر بتجارب منها الحلوة ومنها القاسية، بيمر علينا ناس بقعدو يحكو عن تجاربهم، واحنا فورا بنقول عنهم فلاسفة، و بينا وبين حالنا بنحكي"ياترى كيف قدرو يوصلو ويلاقو فلسفتهم".

القصة يا جماعة إنو في ناس بتتعلم دروس من التجارب اللي عاشتها، بس الفروق بين البني آدمين سبحان الله، ناس بتتخذ الدروس منهج وفلسفة وبتعلنها، وناس بتتعلم من التجارب وبتطبقها بدون ما تعلن، وناس ممكن تتاخر فى انها تفهم الدرس بس بتستفيد عالمدى الطويل، وناس بتغلط مرة ومرتين وتلاتة ..

كيف أعرف حالي انا وين ؟

بدك قعدة هادية مع نفسك او مع حد بترتاحلو و فضفض" الفضفضة" يا جماعة أحسن وسيلة للراحة ولاكتشاف الذات، أقلكم بلاش تقعدو ما حدا، جيبو ورقة وقلم، واكتبو كل اشي بنفسكم اى مشكلة او موقف محيركم اعتبروه متل مسالة الحساب 1+1 =2 ، لو ما طلعتش 2 يبقى راح تطلع 3 ممكن جدا .

أنا يوم ما كتبت التدوينة هاى كان عمري 23 سنة ، يعني بفارق سنتين ونص عن هلقيت، والحمدلله بما إني عرفت فلسفتي بالحياة، صدقوني ماتغير اشي، بس بفارق دروس جديدة ما مرت عليا ولسا بنتعلم ..

طلعت ب 3 دروس مهمة كتير من مدرسة الحياة ، هي اللى شكلت فلسفتي

التجارب السعيدة:

التجربة الأولى بتطيرك فى السما

التجربة التانية بتقلك انت لسا عايش

التجربة التالتة بتقلك بكفي، خلي لغيرك

التجارب المؤلمة:

التجربة الأولى موت تجريبي

التجربة التانية بترجع لحياتك الطبيعية

التجربة التالتة بتخليك فيلسوف

تجارب ملهاش مسمى:

الضربة اللى بتكسركاش بتقويك

إرمي فورا أي شيء ممكن يذكرك بموقف انت بتكرهو

هادا راح يحسن شعورك لقدام

خلي حكمتك في الحياة: و لنفسك عليك حق

انت كمان طل لقدام و أهم اشي انت بس بالعدل ..

نعي إنقسام فلسطيني وتقبُل تهاني

2011-04-27T12:08:00.000-07:00

نعي إنقسام فلسطيني

إنتقل إلى رحمته تعالى اليوم الانقسام الفلسطيني عن عمر يناهز 4 سنوات سوداء من تاريخ الشعب الفلسطيني، فقد فيها خيرة شبابه، وفقدت فيه فلسطين، و جر شعبنا إلى ويلات حصار لا تعد ولا تحصى.

تقبل التهاني وتُشحذ الهمم لوطن موحد "فلسطين" ابتداء من هذه الليلة في جميع أنحاء الوطن ..

تحيا "فلسطين" عربية حُرة

ملاحظة: اللي مش عاجبو ييجي غزة يشرب من بحرها أو يبلطه
نتياهو سِد بوزك احسنلك

صباحٌ آخر يملؤه العار - vittorio

2011-04-16T01:03:00.000-07:00

لم تغفُ عيني هذه الليلة إلا بضع دقائق، ومالبث أن شق نور الشمس طريقه ليومِ جديد، ولكنه للأسف يومٌ كسابقه، شعور بالعار وخيبة الأمل يلتصق بي التصاق الجلد بالعظم، حزن يجلد الروح 1000 مرة في كل ثانية، لقد رحل فكتور، لا لقد مات فكتور، والأصح : لقد قُتلَ فكتور.

أنا لن أدعي شيئا حول فكتور، وأنه كان صديقاً شخصيا أو ما شابه، لكن صلتي به كفلسطينية غزية، كصلة صانع الجميل بالمٌحتاج، رأيته يوم خطت قدماه أول خطوة عند الميناء قادما ليقدم دعمه لنا مع سفن فك الحصار، ليقف في وجه أكبر قوة ظالمة على الأرض، من منا ينساه حين قبل أرض الميناء بعد وصوله؟.

من منا لم يره في مسيرة او مظاهرة خرجت في نهار ما بغزة، من منا لم يقف لينظر إليه بالشارع وهو يغني أناديكم، ويبتسم لنا ابتسامة الأخ المُحب، من و من و من !!! .

يا للعار الذي التصق بنا كفلسطينيين لأبد الدهر، "كان ينادينا ويشد على أيادينـا"، ونحن بغباء منقطع النظير عرفنا كيف نرد له جميله، فاخترنا قتله، اعفيناه من واجب ترك بلاده وأهله من أجله " غزة".

كيف استطاع هؤلاء الذين لا يمتون للشرع او الدين او أدنى مبادئ الانسانية فعل هذا، أي مبرر أعطوا لأنفسهم، تبا لكم ولعقولكم الفارغة، تبا لكم، تبا لكم، لن نرتاح قبل أن نثأر لفكتور، قبل أن نراكم يا قتلة فيكتور معلقين على المشانق، وهذا أيضا لن يكفي ..

أنتم لم تقتلوا فكتور وحده، قتلتم فينا تلك الروح بالفخر كفلسطينيين، قتلتم نضال السنوات من أجل الحرية و الانسانية، كيف نرفع أعيننا بمن سيأتوا بعد قليل ليتضامنوا معنا؟؟.
أيها المتضامنون معنا يا من تركتم كل شيئ يا من آمنتم بالسلام و الحق للفلسطينيين لا تأتوا إلى هنا، سنقتلكم، بعقولنا الفارغة، بتعنتنا وسذاجة أفعالنـــا وضياع إيماننا بكياننا كفلسطينيين، بضياع مفهوم الوحدة و السلام، بضياع الحياءِ منا ..

أرجوكم عودوا إلى بلدانكم فنحن لن نجد ما نرد به جميلكم، انتم يا تيجان الرؤوس، فالعار حجب سماء غزة ولَفَها حين صعدت روح فكتور ..

Vittorio Arrigoni

2011-04-14T18:11:00.000-07:00

Gaza - Day of shame! RIP Vittorio. We will never forget

you, you are a hero of Palestine.

Vittorio we are sorry , we are shy from ourselves , from your family .

Apologies Vittorio, Apologies Italy. This gang represents hate, not Palestine; it advocates fear & murder, not the freedom we seek and struggle for. Vittorio was our partner for peace, justice & freedom. He does not deserve this; no one does. From Palestine, prayers & apologies.

في يوم و ليلة

2011-04-05T05:07:00.000-07:00

الست هاي كل مادا بزيد احترامي إلها

في يوم وليلة خدنا حلاوت الحب كله
في يوم وليلة انا وحبيبي دوبنا عمر الحب
كله في يوم وليلة
عمري ما شفته ولا قابلته وياما ياما شاغلني طيفه
نسيت الدنيا وجريت عليه سبقني هوه وفتحلي ايديه
لقينا روحنا في بحر شوق نزلنا نشرب ودينا
فيه ومين يصدق يجري ده كله ونعيش سوا العمر كله
في يوم وليلة

من برة هالله هالله

2011-04-04T11:55:00.000-07:00

يسعدلي مساكم،،

مدرسة الحياة

الدرس التالت

هنتعلمو بطريقة المشاركة..

عمركم قابلتو المراهقين الكبار؟، قبل ما تحكو آه أو لأ تمعنوا في الأشخاص اللي حواليكو كويس ..
في صفات معينة إلهم بشخصياتهم وتعاملهم وطريقة تفكيرهم، و أهم عامل مشترك بينهم إنو إحنا ما بنقدر نكشفهم الا بعد حين ..

لاجئ <<< لأ >>>مواطن

2011-03-27T12:41:00.000-07:00

قبل كل شيء ما زلت عند مقولتي"اللهجة العامية أقرب إلى القلوب والعقول".

كثيرة هي التصرفات التي يبررها مجتمعنا الفلسطيني تحت عباءة العادات و التقاليد، في قطاع غزة ذلك الشريط الطولي على حدود البحر المتوسط و المحاصر منذ ثلاث سنوات، يختبئ ثعبان سام ضخم يٌدعي:" لأ" حين يتعلق الأمر بمصاهرة بين لاجئين و مواطنين، سأسرد لكم عينة من ذلك..
س. ل فلسطيني من يبنا في السابعة والعشرين من عمره خرج إلى باريس منذ 3 سنوات لدراسة الماجستير، هناك تعرف إلى زميلته م. أ الفلسطينية من غزة، أعجبا ببعضهما، وحدود التربية لم تسمح لهما بأكثر من هذا، صارحها بأنه سيطلب يدها للزواج فور عودتهما إلى قطاع غزة ..
تخرجا و عادا على نفس الطائرة إلى مصر، ومن مصر إلى القطاع، عرض س.ل القصة على والده الذي أبدى حنقا شديدا وكان رده الوحيد:"ليش ما تاخد من بلدنا، مهاجرة متلنا متلها"، وحين سأل س.ل والده عن السبب كان رده:"هيك عاداتنا وتقاليدنا"، بعد أيام من محاولات الإقناع اتصلت والدة س.ل على والدة م.أ لتسألها عن إمكانية أن تزورهم لطلب يد العروس، وهناك تحت سقف منزل م.أ كان النقاش يحتدم بين أفراد أسرتها، ورغم السمعة الطيبة و الخلق و العلم الذي تحلى به س.ل كانت النتيجة اتصال من والدة م.أ لوالدته:" واللهي أبو البنت مش موافق، ما برضى إلا بمواطنين، الله يعطيه أحسن منها وفرصة سعيدة"، لم يترك الشابين جهدا إلا وقاما به حتى اصطدما كليهما بالسد المنيع من والديهما، رد والد س.ل كان كالتالي :"إزا اتجوزتها بغضب عليك"، أما رد والد م.أ فكان:" تقعدي في الدار عندي تخدميني ولا أجوزك إياه".
إحدى صديقاتي حين ناقشتها بالأمر ذكرت لي قصة مختلفة نوعا ما، تقول:"طول عمري بمدارس الوكالة، وما بعرف إنو في إشي اسمه مهاجر و مواطن إلا يوم ما دخلت الجامعة، منعني أبويا أتعامل مع مواطنين إلا مرحبا و السلام عليكم، أنا بهديك اللحظة قلت عنو عنصري، ما رديت عليه ولما احتكيت بزملائي المواطنين لمست اختلاف بالعادات و التقاليد لحد كبير، الاشي اللي حسيته عمل حاجز بينا، ولما اشتغلت كان مديري فلاح، ودايما كان بيظهر سخطه على المواطنين والمهاجرين، لأنو سبق وطلب إيد بنت جيرانه المهاجرة و أهلها رفضو".
المئات من القصص التي تختلف بالتفاصيل وتتشابه بالنتائج، رفض قاطع مبرر بأسباب واهية من الجهتين، فيما يظل الكبار متمسكون بكلمة واحدة :"من طين بلادك لطخ عخدادك"، وسنقف هنا، لنتساءل جميعا، ولنسألهم هم الكبار من بيدهم القرار الأخير رغم أن المسألة في النهاية هي ارتباط شخصين:" إيش هي بلادنا"، وعن أي تقاليد نتكلم؟.
قبل أي شيء لن ننكر نجاح عدة حالات من المصاهرة تحصى على أصابع اليد بين أطراف أصلها فلسطيني، بيد أن هذا الشيء يكشف لنا عن هوة اجتماعية عميقة، سأكون صريحة جدا معكم إن قلت إن الاحتلال الإسرائيلي قد نجح بإيقاعنا تحت مؤامرة كبيرة تدار علينا كشعب فلسطيني, مؤامرة فكرية وذهنية ونفسية، فبعد أن احتل أرضنا وقسمنا إلى قطاع غزة و الضفة الغربية والقدس وأراضي ال48، دفعنا لنقسم أنفسنا، وهنا سأتكلم عن قطاع غزة إلى أربعة تقسيمات أولها التقسيم القديم الشائع: مدنيين= سكان المدينة، فلاحين = أصحاب أراض و مزارعين، صيادين، بدو، نَوَر، ومع مرور الوقت ظهر التقسيم الجديد: مهاجرين =من تركوا مدنهم بفعل الاحتلال وجاءوا إلى قطاع غزة سواء كانوا مدن أو فلاحين أو بدو، مواطنين= سكان قطاع غزة الذين لم يهاجروا، عائدين= سكان الخارج من هاجروا وعادوا مع أبو عمار إلي قطاع غزة عام 1994، و التقسيم الخفي: فلسطينيين، ضيوف= من أتوا من بلدان أخرى وسكنوا القطاع، أشراف، وخارج حدود القطاع سنجد التقسيم الرابع: غزاوي، ضفاوي، شتات.
ومن هناك ظهرت مشكلة س.ل و م.أ و آلاف الشبان غيرهم، هذا فلاح و ذاك مدني، أنا ابن يافا و أما هو ابن حيفا و تلك جماعة المجدل، فل ننسى هذه التقسيمات إذا كانت تنطوي تحت راية التفرقة بين أبناء الشعب الواحد، و لنتفاخر بها من باب التذكير بـ"حق العودة"، كيف نطلب وحدة الوطن وقد عزلنا أنفسنا عن بعضنا البعض، ولم يغفر دمنا الفلسطيني أو جيرتنا ولا حتى أرضنا التي نتشاركها لبعضنا هذه العنصرية.
سأعود لنقطة المنتصف، سأوجه حديثي و أوجزه للكبار مرة أخرى في ثلاث نقاط:
1. قول قدوتنا الرسول عليه الصلاة والسلام :"لافرق بين عربي على أعجمي إلا بالتقوى"، وقوله أيضا:"إذا أتاكم من ترضون دينه وخلقه فزوجوه، وإلا تكن فتنة في الأرض وفساد كبير".
2. قول الله عز وجل :"انّما يتقبّل اللَّه من المتقين" وليس من مهاجرين أو مواطنين، و قوله تعالى :"وَأَنِ احْكُم بَيْنَهُم بِمَآ أَنزَلَ اللّهُ وَلاَ تَتَّبِعْ أَهْوَاءهُمْ".
3. إذا كنا اليوم نهتف ونحلم بفلسطين موحدة علينا أن نشفى من أفكار وفوارق جاهلية مدسوسة صنعناها بيدنا وتغلغلت فينا لا يرتضيها أحد، لماذا نكسر أحلام أولادنا على صخرة بالية لا شرع لها ولا دين، لماذا نتغنى بتاريخنا الفلسطيني ونضالنا المستمر في حين أننا نواجه واقعنا بقناع مزيف، كلنا فلسطينيين أوجاعنا واحدة وهمنا واحد فمتى يصير عقلنا وقلبنا فلسطينيا واحداً ؟

تعريفات مهمة:
اللاجئ: هو الشخص الذي يفر من الخوف والاضطهاد، ولا يستطيع العودة بأمان لدياره الأصلية.
المهاجر: هو الشخص الذي يترك مكان سكناه أو موطنه الأصلي و يتجه إلى مكان آخر من أجل تحسين الوضع المعيشي من الناحية الاقتصادي، وفي حالتنا الفلسطينية تسمى هجرة داخلية، وتشمل اللاجئون الفلسطينيون المقيمون داخل حدود 1948، والمقيمون في الضفة والقطاع.
تعريف مبسط: اللجوء أو اللاجئون هو تجمع لمهاجرين تركوا ديارهم قصرا نجاة من واقع الظلم والمعاناة على أمل الرجوع الذي لا تنازل عنه.
لمزيد من الوعي بما نعيش بإمكانكم مراجعة المواقع التالي:
http://www.palestinehistory.com/arabic/issues/refugee.htm
http://www.arabnyheter.com/ar/index.php?option=com_content&task=view&id=8070

غزة و الزنـــانة

2011-03-23T12:25:00.000-07:00

عزيزتي الطيارة:

تيجي إتزني في صرصور ودني مثلاً ؟؟

جلد السيفون من غير معلم

2011-03-22T05:14:00.000-07:00

خلاص إذاعة صوت الوطن حكت وناقشت كل مشاكلنا في فلسطين و جايبالنا خبير مواسير عالصبح يحكيلنا عن أنواع جلدة السيفون.
يصبحكم بالخير

مدرسة الحيــاة

2011-03-18T07:36:00.000-07:00

الدرس التاني

أنا بحب حالي..

كيف حالكم ..

مرات كل حدا فينا بس يوقع في أزمة بفكر إنو هادي هي أزمة حياتو، ومش راح يجي أصعب منها، وبتمضى الشهور و السنين وبوقع في أزمات أشد، والنتيجة دروس في كل أزمة و التلميذ الشاطر هو اللي بستفيد ..

بعيدا عن الفلسفة عشان بحبهاش بالمرة، أنا و انتو عارفين هيك منيح والكلام هادا سامعينو مليـــــــــــــــــــــون مرة، بس طبيعة البني آدمين إنو الأزمات بتشل تفكيرهم في أولها، يعني بننسى مرحليا إنها بكرة بتهون وهتروق و تحلى، أحيانا الأزمات هادي بتكون اختيارية، آه آه زي ما بحكيلكو اختيارية، احنا بنكون المسبب الأول إلها ومامعناش خبر، وبس نوقع فيها بنصير نقول يا خيبتيه يا ورديه..

راح أعطيكم مثال: خلينا نحكي على الاشخاص اللي بحياتنا بهادا الدرس، كتير منا بفكرو إنو سبب ازمتهم أشخاص فهموهم غلط، بس أنا بحكيلكم إنو انتو اللي أعطيتوهم فرصة يفهموكم غلط، دايما بنحكي هي الطيبة الزيادة اللي موديانا في داهية"، يعني ما زال عارفين هيك، بنكون طيبين مع الناس ليش؟

والقصد هنا مش إنو نكون لئيمين في تعاملنا مع الناس، لا أبدا كونو على طبيعتكم بس ما تعطو انطباع انكم رمز الطيبة في الكون حتى لو كنتو هيك هالحقيقة، كل شخص لو ايش ما كان عندو ذرات من حب الذات، وأنا بقلكم يا ريت اتنمو هاي الذرات داخلكم بطريقة تخدمكم في حياتكم، يعني حب ذاتك وانت ناجح و انت متعلم و انت محقق الصعب ومكسر المستحيل، ومش غلط في شوية أنانية كمان ما كلنا بني آدمين، وهاي صفات متأصلة فينـــا، ونختصر عشان جرس الحصة عدو ضرب..

القاعدة بتقول : حب حالك ثم حالك ثم حالك ثم حب إمك وأبوك و حب القمر و البحر و بعدين الناس

إوصل لتفاهم بينك وبين نفسك وبين أهلك وبين شريكك وبعدين الناس

أبدا ما تستبدل مصلحتك ع مصلحة الآخرين وياريت نحذف كلمة تضحية لو هنضحي لغير إمنا و أبونا وشريك حياتنا

ياريت ننسى الناس لأنو الناس دايما بتنسى وتبيع على أقرب مفرق..

اسمع أقلك

2011-03-18T07:05:00.001-07:00

عزيزي عباس
بخصوص الترتيبات، نفرشلك معبر إيريز ورد مثلاً ..

من اجل فلسطين

2011-03-16T10:05:00.000-07:00

15 آذار الشعب يريد إنهاء الانقسام

أول مرة بحياتي أنزل ع مظاهرة، ومش خجلانة من هيك، بس الأكيد لو ما انتهى الانقسام مش راح تكون الأخيرة لو إيش ما صار ..

2011-03-16T09:55:00.000-07:00

فلســـطين

2011-03-13T12:08:00.001-07:00

ازا مش قادرين تنزلوووو على الشارع يوم 15 آذار

ما تنسو تعلقو علم فلسطين عشبابيك بيتكم ..

أهليــــــــــــــــــــــــن والله

2011-03-12T08:48:00.000-08:00

بسأل صبية عمرها 18 سنة إيش هي الثوابت الوطنية؟
قالتلى: المية و الكهربا وفتح المعابر

كيف تقنع أهل الدار لتشارك فى 15 آذار

2011-03-07T04:42:00.000-08:00

يمسيــكم بالصبر و طولت البال ..
عندي شحنة حنين زايدة عن الحد المسوح فيه لوطن حُر، ما بعرف هل تفجرت نتيجة اني حضرت حفل تكريم للمدونات وخلاله كان في عرض لفرقة غنت أغاني وطنية طحنت قلب الحاضرين، أو إنو موعد ظهور هالشحنة طبيعي بحت..
من شهر ومن بعد تونس وبعدها مصر و إحنا الشباب في غزة بنحضر لثورة على الانقسام، مئات من المقالات و المجموعات على الشبكة كلها بتحشد لهادا اليوم مستهدفة الشباب على وجه التحديد ..
العقبة اللي ححكيها واجهتها عدة بنات و احتمال شباب كمان، عينة مصغرة من قصص بنات أنا سمعتها بس الفرق انها صارت معي.
أنا : " بابا بدي أنزل يوم 15 آذار على التجمع و أشارك لو سمحت"
الرد: "اقعدي يابا الله يهديكي".
أنا: " بس هادي اللحظة اللي كلنا بنستناها عشان نتحرك ونقتل الصمت وننتقل ل مرحلة الشعب بيحددها".
الرد:" يابا انت مش شايفة ايش صار بالشباب اللي طلعو وخاصة البنات؟، مش انت بتعرفهيم وصحباتك، ما حكولكيش؟".
أنا: " حكولي، بس اللي عملوه مش غلط، انت شايف انو غلط نسكت عالانقسام و الحصار؟".
الرد:" مش غلط يابا، بس ساعة ما ياخدوكي مش هعرف اجيبك، لأنو ببساطة بعرفش حدا فيهم".
بعتقد الكلام لغاية هنا بكفي ووصل اللي بدي ياه، والله راح تواجهو كلكم وبالاخص الصبايا، بس هادا كان ملخص الحوار الاول،وكان شبهو الحوار التاني والتالت، بنصيحة صديقة إحكو معهم بهدوء وتروي ومن دون عصبية، يعني بين قوسين" اتخلوش زرابينكم تطلع"
إمبارح كنت بحكي مع بابا في نفس الموضوع بردو كمحاولة شبه أخيرة
أنا:" بابا انا حشعر بالعار لو ما نزلت يوم 15 آذار".
الرد:" ليش يابا ؟" .
أنا:" كيف ليش يا حج احنا الشباب صارلنا كتير بننتظر هالفرصة واحنا مش اقل من شباب اى دولة احنا صحاب حق مش انت اللي كنت بتحكيلنا على الانتماء للوطن، صارلنا مدة طويلة واحنا بنحشد لهاليوم، نقوم احنا الشباب اللي مفروض فينا نكون نقطة انطلاقة نتخلى عن مبدئنا على أقرب مفرق".
الرد:" فكري يابا منيح، انا بمنعكيش بس انا خايف عليكي"
أنا:"بعرف والله يا حج بس احنا ما تعودنا نتخاذل فيوم او ننسحب ، انا بعد اذنك بدي أنزل، لانو ما اعتقد ضميري راح يسيبني في حالي وانا بتخلى عن مبادئي وصوتي ووطني".
ونرجع لجرعة الحنين الزايدة اللي ظهرت فى الاحتفال و الكلام اللى إنقال هناك و الروح العالية و المشجعة أعطت دفعة للكل شباب و أهالي، أرجوكم خلو عندكم الشجاعة و الصبر اولاً و أخيرا و احكو مع أهلكم صحابكم والكل، عشان نوقف وقفة وحدة ..
وحابة هالمرة نتفاعل ونطلع بطرق لاقناع أهلنا .. وسمعونا صوتكم

اختر الاجابة الصحيحة

2011-03-04T11:56:00.000-08:00

من وراء انقسام شطري الوطن ؟

ا. الشيطان

ب. أبو جهل

ج. البقدونس

سؤالين عالطاير

2011-02-25T05:28:00.000-08:00

أصدقائي،

قراء مدونتي الأعزاء،

بعد ما تقرو نص التدوينة هتعرفو او حتى تتأكدو إني مش بحالة جيدة للكتابة، لكن حبيت أشرككم معي بالجواب على سؤالين بيلفو فى دماغي من مدة ..

الهروب نص المراجل ؟
قديش الواحد فيه يدافع عن إشي حاسو مناسب وسط مليون مقتنعين بالعكس ؟

دمتم مقتنعين باختياراتكم ...

كبشة مناسبات

2011-02-13T14:45:00.000-08:00

مساء الحرية،

وأخيرا عشنا و شفنا الخريطة السياسية للوطن العربي بتعمل نيولوك، وفي أخبار انو القمة العربية القادمة راح تكون قمة تعارف، وبعيد عن السياسة ولاياتنا المتحدة الغزاوية قالبة حمراااا، و أحمر على أبوه يا بطيخ، الفنانتاين عامل عمايلو ويا خوفي الشعب كلو يفنن بالفنانتاين ..

هو إحنا إيمتا بدنا انبطل استبهال، ونحس بالمسؤلية تجاه اللي بنعيشو ؟

مصر يا أم الدنيا

2011-02-02T10:06:00.000-08:00

عزيري مبارك

بالنسبه لخطبة الوداع مش مكفيينك ٧٠ مليون مستمع

بالشارع عشان تلقيها مثلا

قناة القلق الشعبية

2011-01-12T15:17:00.000-08:00

مسا الخير،،

مشاهدينا، قرآئنا أو حتى مستمعينا ..

تدوينتي هالمرة زغيرة، بس لأنو الكلام القليل أكتر نفعا أحيانا

الكل اليوم بحكي عن الحرب اللي جاية، الناس ما عندهاش اشي يشغلها، بدكو الصحيح مش خايفين، فريق ماشي ع قاعدة "إيش هنشوف أكتر من اللي شفناه"، وفريق بقلك بدنا آكشن بالحياة، ماتعودناش على الركود السياسي، أصلا إحنا لو لاحظنا حياتنا كمجتمع فلسطيني بال100 سنة الأخيرة بنلاقينا بننتقل من حدث ل حدث، احتلال وبيع اراضي و انتفاضات وحصار ومجازر, إلخ ....

صناعة القلق

هادا بقلك الحرب في شهر 3، وهادا بقلك الحرب راح تحصد ضحايا 4 أضعاف ضحايا الحرب اللي فاتت، واللي بقلك راح يجونا من البحر، ولا اللي قصتو قصة قال إيش: راح يحطو تحت كل عمارة دبابة، والقناصة فوق أعلى 3 أبراج، هدول هما العاملين في قناة القلق الشعبي، قناة همها الأول و الأوحد صناعة القلق و بثه، ماشالله علينا 90% من أبناء شعبنا عاملين فيها، والحمدلله انا لقطت الاشارة و قلقت ..

لو انت كمان قلقت ابعتلنا رسالة فيها ق-ل-ق على 202020

وتكسب معنا مكواية عالبخار ..

من دفتر الجامعة

2011-01-08T14:34:00.000-08:00

في الجامعة من 5 سنين تقريبا، كنت بحب أقرأ لصلاح جاهين، بعجبني أسلوبو وقررت أكتب بنفس الطريقة

أغلبكم شوية.. حاولو تقرو باللهجة المصرية

الخسيس

عجبي على أبو قلب طيب

يدي الخسيس ولو إنو ما يستحَقش

لا يفيد معاه معروف ولا ضرب كفوف

أصل الخِسة فطبعو دي عادة

عجبي عليه أبو قلب طيب

فاتح قلبو تملي عيادة

مادد إيدو بخير

ما يفرق لا دة و لادة

في الزمن الخسة دي حاجة غريبة

إن الطيبة دي تيجي زيادة

إم الضفاير

البنت أم الضفاير بتلعب مع إخواتها

الصوت يلعلع بضحكاتها

يوم سبت وحد البنت كبرت

وبقت لايصة فمشكلاتها

تذاكر إيه وتحب مين؟

والشاب دا داخل حياتها

والبنت كبرت و بقت تتحب

ونفسها تعجب مليون شب

طقمين كنب

عجيبة الحياة وليها العجب

مش لاقي ياكل و اشترى طقمين كنب

الجيران مراقبة الطريق

ناس تقول إنو بريئ

وناس تقول إنو نصب

والناسين راحو وباركو وقعدو فوق طقم الكنب

نعمة

ما شافش، وطول عمرو أعمى

وعندو جبــــــــــال من الحكمة

و أخينا شايف

داير و لافف

ولا استفاد من النعمة

وعجبي..

راحت بحِلوها و مُرها

2010-12-31T13:12:00.000-08:00

مش راح أحكي كتير

سنة جديدة متأملة فيها خير، وسنة راحت الله يسهل عليها رغم كل شي صار فيها
يارب تعطينا خير السنة وتبعد السوء عن الكل
شتي يا دنيا خلينا نبدا سنة جديده انضيفه من كل شي ..

هُوا أنا لحالي ؟

2010-11-25T01:05:00.000-08:00

حالة شلل فكري

أبو كلب يرحب بكم

2010-11-07T01:46:00.000-07:00

2000 سلام و تحية،،،

من فترة كده شفتوني في بوست سابق كتبت عن أبو كلب، الشخصية الخفية اللي خنقتني وخنقت كبشت ناس بعرفهم..

أبو كلب عشان تفهموه لازم أوصفلكم شكلو وبالتالي بتفهمو نفسيتو وحللوها لحالكم عاد، ونا قاعدة في يوم كده من هالأيام في المحل إلا صفت سيارة سوبارو قدام الفترينا ونزل منها واحد طولا يقدر بمتر وعرضا يقدر ب 3 متر مع مقدمة تتمثل في كرش ممكن لو فتحناه نلاقي 3 عجول على الأقل..

واللي بيجلط إنو بيتمايل يمين و شمال، المهم نزل كمان شخص من السيارة، وفتح اخينا المقصود باب السيارة الوراني وقعد يصرخ:" إنزل، إنزل، بقلك إنزل"، هنا انا استغربت، هو لمين بقول إنزل وفش حدا راكب وراااا؟ ، الشخص التاني اللي معو بحكيلوا:"خودو بالمسايسة،شكلو معند" Lol

وبعد شوية،، مرق من قدامنا أخينا هو وصاحبو وجارر وراه كلب لولوه إلو شعر كثيف مجرور بسلسلة .. أهليـــن

طب انتو استوعبتو المنظــر ؟

ما علينا، بعد يومين نفس المنظر إتكرر، وهالكلب مرة طالع العمارة ومرة نازل من العمارة، وبعد 5 ايام أطلقنا عليه أبو كلب، وفي ليلة من ذات الليالي حوالي الساعة 8 صفت نفس السيارة و هالمرة أخينا أبو كلب مع عيلتو مرتو وعينات زغيرة منو تتمثل في بناتو

للصدف "....."، كنت انا في محل جارتي اللي جنبي، دخل هو و بناتو ومرتو، صحبتي قاعدة عالمكتب و أنا قمت وقفت بعيد في آخر المحل ع اساس مش قادرة أطل على هالمنظر، المهم قعدت اساعد بنتو الزغيرة في اختيار بيجامة، إلا هو بقول لصحبتي بتعرفيليش بنات للخطبة، له يا شيخ..

طبعا صحبتي بنجت، و أخينا بكمل:" أصلو أنا طلقت مرتي التالتة من أسبوعين، وبدور على بنات حلوااااااااااااااااات، وهديك مرتي الاولانية إم لعيال".

وينقل أبو كلب نظرو ما بين صحبتي وبيني، لوووول طب انا قاعدة بسأل مرتو اللي معو هاي ع اى اساس جاية، صارت مرتو تزردنا نظراااااااااااات، يالطيف اللطف..

وانتهى الموقف لما إجا شريكي وطلع بيعرف أبو كلب وأخدهم الحديث ع اساس انو تاجر اسمنت كبير وطلعنا من المحل انا وصحبيتي، وأيام تروح وأيام تيجي وأبو كلب رايح جاي وهالكلب طالع نازل بالسلسلة من العمارة..

ل حد ما في يوم وقف أبو كلب مع واحد من الجيران ساكن بالعمارة وماسك هالسلسة بئيدو ومحكم الامساك، الجار بسألو :" إيش كنك ساكن هان هاليومين، إلا أبو كلب رد عليه وبيشاور عالكلب، لا والله مسكنو هان لحالو عشان نفسيتو تعبانة من اللي شافو"، أمــانــــــــــــــة

بيني وبينكم اتذكرت مشاريع الدعم النفسي اللي مالية البلد، بس متل الدعم النفسي اللي مقدم لهالكلب ما وردش عليا، وبعد شوية شد أبو كلب حبل السلسلة ،وصار الاشي المربوط بالسلسلة يحكي:" ميـــــــــــــــــــــــاو".

منتظرة ردودكم
وسلامة تسلمكم

الخمـول الجميـل

2010-10-29T17:09:00.000-07:00

الخمـول الجميـل
للفنان الاسترالي روبـرت بَنِـي، 1897‬
يعجبني كيف استخدم اللون الأحمر

جوزني شُكرا ..

2010-10-23T16:12:00.000-07:00

حد شاف أبو كلب ؟

2010-10-15T04:40:00.000-07:00

كَلب جارك خَلَف كَلب ..

يوم الركاب العالمي

2010-10-07T02:57:00.000-07:00

مكاتب السيارات اكتر من الهم على القلب، واللهم لا حسد من مكتب سوريا لمكتب اسطنبول لمكتب القاهرة لمكتب باريس والقارات كلها يا قلب لا تحزن، و ستين مليون سيارة خط بمكختلف الاشكال و الالوان و السواقين اللي مش معروفلهم ملة و لا شغلة ، لسا طوابير الركاب في تزايد مستمرررررررررررررررررر.

وكأنو الركاب عاملين مسيرات على قرنت كل شارع و رمزون و مفرق، الله يعينا

وعلى قولة شكسبير : إنها معاناة

قررت انا المدعوة رندة تخصيص يوم 7-10-2010

" يوم الركاب العالمي"

وسلامة تسلمكو .....

اي هرب

2010-09-22T23:51:00.000-07:00

اي هرب ما دامت الاشياء تسكننا , وما دمنا حين نرحل هرباً منها, نجد انفسنا وحيدين معها وجهاً لوجه!

كتاب غاده السمان - اعتقال لحظه هاربه

إلحق - البقدونس في خطر

2010-09-17T02:08:00.000-07:00

مراحب يا حبايب
كنت بحكي امبارح مع صحبتي وسام عن السلطة اليونانية اللي بتعملها, فشر أحسن مطعم بغزة بعمل سلطة المهم , وقعدت تحكيلي عن مكونات سلطه والطريقة "طبعا خيار وبندورة و زيتون وجبنة وجزر و وخل وزيت و , بس معلش ما حطيت لكم بقدونس أصلو ضمة البقدونس عشرة شيكل
أنا: نعم ؟
هي:أه
أنا: ليش انشالله
هي: اصلو الغزازوة سحبو بقدونس بكميات بتخوف الفترة اللي فاتت , فالجهات المجهولة رفعت سعره و شح في السوق .
والسؤال المطروح هلقيت :

مين ورا أزمة البقدونس
هل البقدونس متورط في أى أعمال من شانها الضرر مصلحة المواطن
ما الرابط السري بين تفجيرات 11 سبتمبر وانتفاضة الاقصى و البقدونس
هل للبقدونس معارف واصالة فى البلد ؟
على راس مين راح تيجي أزمة البقدونس
وهل راح يتعرض البقدونس حصار دولي؟

إذا كان عندكم أي معلومة تفيدنا برجاء الاتصال على الرقم التالي
خمس خيارات عرق نعنع 3 حبات بصل حبة أفوكادو

2010-09-10T16:30:00.001-07:00

وداعاً طل الملوحي

صوت سوري كتب لغزة

كل عام وانتو بخير

2010-09-09T18:24:00.000-07:00

عالطريق

2010-08-12T00:29:00.000-07:00

الجمعة اللي فاتت طلعت أنا وصديقتي مشوار، طبعا الجو حر، وين نروح وين نروح، قررنا إنو نتمشى على البحر، وفعلا بدينا نمشي ووصلنا شط الشيخ عجلين
كلشي كان تمام والمغرب قرب والشمس بردت متل ما بقولو..
إلا مرقت صبية سايقة سيارة ومش حاطة حجاب، والشهادة لله البنت سايقة بكل احترام ومافي شي منها مؤذي، بس كل الشارع صار يطلع، الموقف خلق أزمة سير عنيفة، واحد من اللي قاعدين فى نص الشارع وحاطط أرجيلتو بشكل مخزي قال : إتفووووووووووووووووو عليكي يا كافرة.
عفوا على أى اساس بتف، وعلى اى اساس بتكفرها، مش شايف حالك؟ و الزحمة هادي ايش اساسها الفكري ؟
ليش إحنا شعب لليوم مستغرب اللي بيشوفو، إيش اللي عملته الصبية هاى عشان يحكيلها هيك.. والمنظر هادا يعني جديد علينا ؟
كان نفسي إحكيلو روح يا شيخ المفروض انت اللي .... عليك والله ..

جيتك يا عبد المعين إتفك

2010-08-07T15:37:00.000-07:00

مش عارفة هو الموضوع بحصل معايا أنا بالذات ولا حاصل مع كل البلد، فبالتالي بنقدر نسميه أزمة؟؟.

هادا من فترة كنت نازلة أدور على خياطة تخيطلي جاكيت ، المهم نزلت من بيتنا وركبت سيارة عن الشارع، فتحت الجزدان وللأسف ما معي الا ورقة بخمسين شيكل ونص شيكل، مسكت الخمسين وقلت للسواق اتفضل، قالي أوووف كل هادي معكيش شيكل فكة، قلتلو لا والله معلش،بس معي نص شيكل إتفضلو، قالي لا خليها عحسابنا هالمرة، انا ما طاقتني الشربة ووجهي إحمر و اخضر واصريت إلا أعطي السواق النص شيكل، على اساس المبدأ اللي بقول :" إشي ومنو".

نزلت عند الخياطةةةةة اللي حاولت معها بشتي الطرق عشان تخيطلى الجاكيت وأبدا، ووصفتلى خياطة عند جامع الكنز، مشيت كده قد 5 دقايق ووصلت المكان، حكيت مع الخياطة بس مانفع إنها تخيطلي الجاكيت عشان الماكينة تعت القماش مش عندها، حملت حالي وطلعت، طبعا كنت في نص سوق الرمال، دخلت الميني ماركت اللي جنب إيميد إيست، شريت إزازة عصير ع أساس أفك الورقة إم الخمسين، إلا والبياع بحكيلي آسف والله فش فكة .. S:

رجعت العصير عالتلاجة، وسحبت حالي ، بعد بعشرة متر لقيت ميني ماركت تاني، قلت خير ، دخلت شريت إزازتين عصير عشان ما يكون للبياع حجة، إعطيتلو الخمسين، جحرني S: ، آآآآآسف مافي فكةةةةة توى إجاني زبون أخدها كلها، أأأأأوف تكرر الموقف رجعت العصير عالتلاجةةة وطلعت أجرجر أذيال الخيبة ..

والشمس حاميةةةةةةة والساعة 5 العصر، وانا ماشية صادفت صيدلية الجندي المجهول، قلت خير بفك من عندهم، دخلت طليت هيك المهم قلت كويس بجيب شامبو ، طلعت الورقة أم الخمسين واعطيتها للصيدلانية، قالتلي: فش فكة متأسفة معكيش 15 شيكل، قلتلها لا والله ولا شيكل معي، فكرت شوية مع حالها وإعطتني ورقتين عشرين..

المهم طلعت أنا فرحااااااااااااانة زي اللي كسبت مليون دولار.

صدقت حالي معي فكة ورقتين عشرين.. وقفت سيارة وقلتلو التلاتيني ع اساس رايحة لخياطة تالتة، مديت ايدي للسواق ادفع بالعشرين الورق قالي مافي فكة معي، قلتلو نزلني ، ورحت وانا موقفة سيارة تانية، عالتلاتيني لو سمحت قالي اطلعي، مديت إديي بالعشرين كمان مرة، والسواق حكالي نفس الاشي ما في فكة ، أووووف إيش أعمل بحالي بهاي اللحظة ؟

حملت حالي ونزلت ، وما كان الحل إلا إني طلبت تاكسي ويكون معو فكت عشرين، بس السؤال اللي بيطرح نفسووو، وين الفكة ؟؟؟ مين اللي ماخد فكت البلد كلها ؟؟؟

على قد السؤال

2010-08-01T04:25:00.000-07:00

كل يوم الصبح بصحى بسأل حالى نفس السؤال وازا ما سألتوش لحالي، في ناس لازم تسألني إياه :

"إيمتا ترجع الحياة لطبيعتها" ؟.

بس استنو شوية، هو لو الحياة رجعت طبيعية في غزة، راح يعجبنا الوضع؟
طب إحنا راح نرجع طبيعيين، طب هو إيش الوضع الطبيعي لغزة؟.
ما بديش نتخيل المدينة الفاضلة، خلينا مرة نجاوب على قد السؤال ...

يوم التدوين لأجل غزة 9-7

2010-07-08T11:33:00.000-07:00

راح تبقي مضوية بقلوبنا رغم العتمة اللي بتلفك

راح نبقي فيكي وتبقي فينا

Shawq-Longing شوق- Amal Murkus

2010-06-30T22:42:00.000-07:00

ألف مبروك

2010-05-12T10:55:00.000-07:00

كثيرة هي المناسبات الاجتماعية هذه الأيام، خاصة حفلات الزفاف، وقد دعيت من إحدى صديقاتي لحضور حفل زفاف أختها، كالعادة اجتمعنا نحن الصديقات للذهاب للعرس سويا، وصلنا القاعة التي يقام فيها العرس ، و اللهم لا حسد القاعة التي تستوعب خمسمائة سيدة كان بها ألف سيدة على الأقل، كلهن يقفن على أرجلهن، حتى أنني لم أر أيا من العروسين نتيجة الاكتظاظ حولهما، القاعة كلها تصفق و تعج بالصفير، ومازلنا لا نرى العروسين من موقعنا في آخر القاعة، السيدة التي كانت تجلس بجواري اقتربت من سيدة أخرى بجوارها لتقول لها:"مش قادرة أصدق حالي، كيف اتجوزو هدول"، لم أفهم ما تعنيه، حتى اضطررت للوقوف أنا الأخرى لأتفهم حقيقة الوضع، وخرج أهل العريس ليتركوا الحفل لسيداته، ونظرت لأرى بعيني ما لم أكن سأصدقه لو رواه أحد لي، العريس من ذوي البشرة السمراء و العروس من ذوي البشرة البيضاء.

غابت عني تفاصيل العرس وكل ما شغلني كم هو جميل أن نرى تلك العادات البالية بعدم التزاوج بين ذوي البشرة المختلفة تزول إلى حيث لا رجعة، وفي عرسهما أسامة وليلى، كٌسرت أول تلك الفوارق، كل التحية لشابين احتاجا الكثير من الشجاعة لتنفيذ خطوة كهذه، خطوة ستحارب من الكثيرين بدعوى عادات وتقاليد بالية ليس لها أساس من الصحة.

ومازالت قصص الزواج كثيرة لنرويها، لطالما استمعنا لقصص تروي مهورا غريبة تطلبها العرائس حول العالم، كتلك الاسبانية التي طلبت يختا مهرا لها، والعجوز الروسية التي طلبت من عريسها عشرين محمولا من ماركات مختلفة، ولكن أغربهن على الإطلاق قصة المواطنة الفلسطينية س.ع من محافظة رفح التي فاجأت أهل عريسها بمهرها الغريب، حيث طلبت ثلاثة موتورات من الكهرباء، لسببين الأول أنها تخشى العتمة حين تنقطع الكهرباء، و الثاني عدم رغبتها في تفويت أحدي حلقات المسلسل التركي الذي تتابعه، على أن لا يقل الموتور عن 5 كيلو صناعة إسرائيلية، و أتساءل هل هذه العروس جاهزة عقليا و نفسيا فعلا للزواج ؟.

Made in china

باتت السلع الأجنبية أرخص وأكثر استعمالا هذه الأيام لا سيما الصينية منها، كل ما نأكله، نرتديه أو نشتريه صينيا، وما علينا إلا النظر إلى مكان التصنيع حتى نقرأ :"صنع في الصين"، كل ذلك وارد إلا قصة استيراد عروس صينية، يرجع أصل القصة حين كتب الزميل المصري محمود خليل مقالا له قبل سنة ونصف بعنوان "عروس مصرية للزيدي وعروس صينية لي" طلب فيه عروسة صينية بعيدا عن تعقيدات الأسر المصرية التي تضع عقبات لا حد لها أمام الشباب الذي يرغب في الزواج.

و يبدو أن السفارة الصينية قرأت المقال وترجمته وأرسلته إلى بكين، حيث نشرته وسائل الإعلام هناك، فكان أن بدأت اللجان الاجتماعية والمؤسسات النسوية في الصين اجتماعاتها حتى أقرت إمكانية تصدير الفتيات الصينيات إلى مصر، و يستطيع الزوج أن يختار مواصفات العروسة الصينية من حيث الشكل والقدرات، مع العلم أن جميع العرائس الصينيات يجدن فنون الطهي والأعمال المنزلية المختلفة، وغالباً ما يكون حجم العروسة صغيراً وقصيرة للتوفير على زوج المستقبل عند شراء الملابس.

وتتميز الزوجة الصينية بأنها لا تشترط سناً معيناً للزوج، كما أنها تقبل بأي رجل، وذلك لأنها زوجة مثالية ومطيعة ولا تناقش زوجها في أي شيء كما أن صوتها لا يعلو ولا تنطق إلا بأمر من زوجها على خلاف الزوجة المصرية التي تشتهر بارتفاع نبرة صوتها وبغضبها المتكرر، بسبب ودون سبب، كذلك لا تشترط الصينية شبكة ولا مهراً ولا شقة ولا فرحاً. كما أنها لا تملك حساباً خاصاً على الفيس بوك فهي لا تختلط بالرجال.

وبما أن كل السلع التي تستوردها جارتنا مصر باتت في قلب مدن القطاع مهربة عبر الأنفاق، حتى تظن حين تمشي في أحد الأسواق أنك في القاهرة، لا أستبعد أن أرى عرائس صينيات الجنسية على اعتبارهن سلعة قريبا في غزة.

وتغيرت طرق المدينة في الحياة - عام على حرب غزة

2009-12-26T08:14:00.000-08:00

لازم أزفر زفرة طووووووووووويلة قبل ما أكتب أي كلمة

اليوم ، زي اليوم بالزبط، 27/12/2008، الساعة 10، كانت بداية مشئومة لحرب على غزة، نتايجها لسا مستمرة، مافش شيئ اتغير، كأن الحرب لسا امبارح، الناس اللي اتدمرت بيوتها نايمة في الشارع، ولا حد سائل فيهم،، الاف الشهدا و اليتامى والارامل و المشردين، و جماعتنا هنا وجماعتنا هناك، بيشدو في بعض، لا قصدي بينهشو فبعض، والضايع بينهم الغلابة اللي بغزة، اليوم ولأن مخي عاجز كليا عن استرجاع ذكريات الحرب المؤلمة هقدملكم مشهد كنت كتبتو من فترة عن حوار دار بيني وبين أختي في ليلة من ليالي الحرب:

في اليوم الخامس العشر من الحرب ، حملت أختى فرشة سريرها، و قررت أن تنام بجانب باب المنزل مع باقي العائلة وحين لم ينم أحد هناك خافت وسط الظلام و نادتني :"رندة أنا مرعوبة تعالي خديني"، يومها كانت الإشاعات بأن الدبابات ستصل هذه الليلة قلب المدينة ، و الانفجارات تهز المنزل بعنف، أتذكر بعد أن وضعنا الفرشة على السرير كيف سألنا بعضنا نفس السؤال في ذات الوقت :"هو إحنا هنعيش ، و هيطلع علينا الصبح؟"، حينها بكينا سويا ، و بدأنا نسترجع ذكرياتنا.

واهداء زغير كتبتو من غزة لقادتنا المحترمين وللعرب اللى نايمين، وبقوللهم إوعو تصحووو ..

وتغيرت طرق المدينة في الحياة

و استبدلت بسماتها بألف آه

هاهُم على الأعتاب أهلها جالسون

كلٌ تجسدَ في رُكام

بيتُ الأحبة، حقلُ البُرتقال، مدرستي، مخبز الجيران، سطح البيت، ومقعد المختار

كل شيء من حطام من حطام

بلغ تميم

يا كاتب التاريخ مر عام

و سرَت بنا الأيام

هاهُم تحت الخيام نيام

و آخرون و آخرون فوق الكراسي نيام

مازالت الكلمات تهطل كالمسكن للآلام

وتغيرت طرق المدينة في الحياة

وعليك غزة قالوا، قولوا سلام

والله لولا نور أهلك ما انقشع الظلام

والبحر يرقب من بعيد

صرخة الطفل الوليد

حملته أمه بابتسام

للخوف لا يبدي اهتمام

للهدم لا يبدي اهتمام.

ستعود غزة من جديد

غزة تقرئكم سلام

رمضان كريم

2009-08-24T05:32:00.001-07:00

هكذا هو رمضان في غزة

أطفالنا يحلمون بالفانوس

يذهبون مع أهلهم الى السوق ليشتروه

يعجبهم لدرجة البكاء

لكن سعره الذي يتجاوز ال 25 شيكلا يشكل عبئا على أهلهم

فيكتفون بالفرجة و العودة الى البيت دونه

تاكسي أجرة

2009-08-17T23:57:00.000-07:00

تاكسي أجرة
- 4.4.09

ما ستقرأونه ليس بجديد , واحتمالية ان تكونوا قد صادفتموه كبيرة ..
كل صباح و انا في طريقي الى عملي و داخل التاكسي , يدور الحوار التالي ما بين الركاب و السائق :

الراديو : الوفود الفلسطينية تستكمل الحوار فى القاهرة و العوائق مازالت تواجه الوصول لاتفاق

الراكب القدماني: يا عمي ولا بعد 50 سنة لما تنحل قضيتنا
السواق : يا عمي والله شعبنا اندبح والناس مش لاقية تاكل
الراكب اللي ورا : بقولك المعونات مش عارفين يتلقوها من وين ولا من وين , و كلو بنسرق
الراكب التانى اللى ورا : فكونا من هالسيرة النكد عالصبح كلامكم هادا لا بيقدم ولا بيأخر انهونا عاد
السواق : بكم الدولار هلقيت؟
الراكب القدماني ب 4 و نص , و بقديش جلن البنزين المصري
السواق : ب 2 ونص
الراكب الوراني : والله انا عبيت السيارة مصري بس يا عمي الموتور بينتع معايا
الراكب القدماني : اخلط الجلن ربع مصري و تلت ارباع اسرائيلي وشوف ازا ما صار الموتور ماشي لوز
انا : قديش الأجرة لتل الهوا ؟
السواق : بشيكل ونص
الراكب اللي جنبي : ليش يا عمى البنزين رخص
السواق : بس قطع الغيار مارخصتش
الراكب القدماني : وبعدين مع دعوة السواقين كل يوم بسعر
الراكب اللي ورا : اتفضل يا سواق
السواق : ايش هادا ورقة بعشرين , ضلكو اشتغلو فيا , فش سواق بالبلد غيري تعطوه ماسك , هات يا عمي فكة يرضى عليك
الراكب اللى ورا : طب هدي اعصابك بلا يطقلك عرق , وهاي احلى فكة لعيونك

و السواق بيصف السيارة على فجاة و بيصير ينده على الركاب في الشارع : يلا تل الهوا , تل الهوا , ع وين طالع يا حج ؟
الحج : ساحة يا ابن خال
السواق : إطلع يا حج اطلع
الراكب القدماني : يابا انت طالع تل الهوا كيف بتيجي معك ساحة ؟
السواق اللي بروح تل الهوا بروح ساحة وكلو بنفد ع كلو , نتبطر عالرزقة يعني ؟ , نقول للركاب تركبوش بطلنا الشغلانة ؟

الراديو : " الحكومة الاسرائيلية الجديدة تنجح في ضم حزب العمل إليها " و إليكم الخبر التالي

السواق بحسلكم نتنياهو هادا تبع 3 وراقات اه والله
الراكب اللى وراه : يا عمي بعرف يلعب منيح
السواق لعيب ماشي بس بلعب بغباوة
الراكب القدماني : بحسو والله نفسو يسيطر على الكرسي بطريقة السيطرة الفلسطينية لازم يتواجد بكل حكومة
valid always: السواق
انا : و دخلك ايش معنى هالمصطلح ؟
السواق : يعني ملزق بالكرسي يختي , مملزق ب غِرى, منا دارس علوم سياسية
الراكب اللى ورا : لسا سواق عالخط احسن من كعوب دايرة وقعدة دار , نزلني عند المؤن
السواق : بلف لفتين و برجعلك يمكن اشتري منك كيس طحين
الراكب القدماني : احجزلي معك رطل ملح , حاكم في ازمة ملح في البلد
السواق : اصلا كل البلد ازمات , إجت عالملح ؟
انا : نزلني عاليمين لو سمحت
السواق :والله ما في فكة يا عمي , خوديلك بكيت علكة بدال النص

على حطت إيدكو

2009-08-02T09:09:00.000-07:00

كيف حالكم ؟؟ ، لو انتو لسا متابعين يبقى انتو لسا بخير ، ملاحظين انو كل ايامنا شبه بعض

حتى اليوم المميز يا بيتميز انو هتحصل فيه مصيبة يا بطلع هو كمان بشبه غيرو بطريقة أو بأخرى ، ما علينا ، مضطرين انو كل يوم نفوت إنام عشان نصحى نشوف يوم جديد متشابه مع اللي قبلو ، بس زهقنا ، عنجد زهقنا ، و أنا ليش بحكي بلغة الجمع ؟؟؟؟؟

عشان كل ما اشوف حدا من فترة و أسألو كيف حالك يحكيلي ، على حطة إيدك ، لا جديد تحت الشمس ، يعني السبب في الشمس اللي هي تحت السما , أي سما؟ ، السماااا الزرقا

قولولي إيش الحل، عفكرة احنا كل مالنا بننطفي شوية شوية ، ولا إيش رأيكم؟